Salma, autora de «Despois da medianoite», visitará esta semana en Galicia

29 Maio 2011

Autores,Feminismo,Narrativa,Noticias,Novidades,Presentacións,Traducións

Hoxe domingo chegou a Galicia Salma para participar nos actos de presentación da novela Despois da medianoite, (Irandaan Jaamangalain Kathai ), un fito na literatura tamil, traducida para o galego por María Reimóndez. Convidada por Implicadas/os no desenvolvemento, Salma viaxou dende Támil Nadu (un estado índio que conta con 65 millóns de habitantes) até Galicia para falarnos de primeira man desta súa novela, da súa realidade e do que implica ser muller, musulmá e escritora na India.

Salma (Thuvarankurichi, 1970) é unha das escritoras támiles máis relevantes do actual panorama literario indio. Provén dunha familia tradicional musulmá dunha aldea próxima á cidade de Tiruchirapalli e como moitas mozas da súa rexión non rematou a escola primaria. Aínda así, dende os trece anos comezou a escribir poesía e máis adiante a publicar en revistas literarias. Durante anos escribiu na clandestinidade, pola oposición da súa familia. A súa obra foi obxecto de críticas destrutivas en sectores literarios polo uso da sexualidade feminina dunha maneira aberta na súa obra e tamén polo contido feminista dos seus escritos. En 2001 accedeu de xeito accidental (pola obrigada cota de xénero na India) á política; comezou sendo membro do Panchayat (asemblea local) para converterse logo en candidata polo seu distrito electoral polo DMK (Dravida Munnutra Kazhagam, partido nacionalista támil laico e progresista) ata chegar a ser directora xeral de Asuntos Sociais do Goberno de Támil Nadu, cargo que ocupa na actualidade.

No entorno abafante dunha pequena aldea de Támil Nadu, do outro lado da luz, no escuro da medianoite, no lugar pechado das casas e das cociñas, no reverso das normas da comunidade, transcorren as vidas de Rabia, Wahida, Rahima, Zohra, Firdaus e o resto das mulleres de Despois da medianoite. As súas arelas, os seus problemas e solucións vannos levando por un camiño de dificultades onde a busca da liberdade se atopa fanada de maneira constante. As finas estratexias de cada unha das protagonistas amósannos os atrancos que as mulleres atopan para desfacer as posicións que lles veñen dadas, que lles son inoculadas a cada paso dende a infancia.

Despois da medianoite supón un fito na literatura támil e propuxo un controvertido berro crítico dende o interior da minoría musulmá, un berro nidio e complexo. Cunha prosa de fiar moi fino, atenta ao detalle, aos tirapuxas de quen loita con forzas desiguais contra cumprir as normas e rachar con elas, a voz destemida de Salma axúdanos a penetrar no escuro, lonxe dos estereotipos e máis preto dun entendemento liberador.

Na súa estancia en Galicia, Salma manterá contactos cos medios de comunicación galegos e desenvolverá un amplo programa de actividades, preparado por Implicadas/os no desenvolvemento, en colaboración con Xerais e diversos centros educativos e cívicos de Santiago e Vigo, cidades que visitará.

Mércores, 1 de xuño

  • Visita asociación de mulleres ALBA en Santiago de Compostela. O diálogo sobre as accións das asociacións de mulleres en Galicia e en Tamil Nadu permitirá que ambas partes coñezan qué é o que se fai dende os movementos feministas en ambos contextos.
  • Presentación da novela Despois da medianoite en Santiago. Ás 20:00 h. na Praza de Cervantes. Coa colaboración da Libraría Couceiro.

Xoves, 2 de xuño

  • ·Visita ao IES Alexandre Bóveda. Ao longo de dúas sesións Salma e María Reimóndez, dúas das autoras do libro Vanakkam/Benvidas, intercambiarán impresións co alumnado (que terá traballado previamente co documento), e comentarán de primeira man cuestións referidas tamén ao país de orixe de Salma, a escrita das mulleres ou a cooperación ao desenvolvemento (11:30 e 13:25 h).
  • Presentación da novela Despois da medianoite en Vigo. Será ás 20:00 h. na Libraría Librouro.

Venres, 3 de xuño

  • Obradoiro literario coa cidadanía. Esta xornada de obradoiro de escrita creativa aberta á cidadanía de Vigo e coordinado por Salma e María Reimóndez engadirá aos tradicionais obradoiros literarios o aliciente de poder contar cunha autora que provén doutro sistema literario e que poderá contribuír cunha lingua e imaxes diferentes a ese traballo xa existente na cidade (17:00-19:30 h. Centro de Documentación e Recursos Feministas da Cidade de Vigo, C/ Joaquín Yánez, 6, 2º andar). Para inscribirvos, non tendes máis que mandar un mail a info@implicadas.com antes do martes 31 de maio.

Sábado 4 de xuño

  • Encontro de poetas galegas con Salma. Dita xornada constará de dúas sesións.
  • Durante a sesión da mañá (11:00 – 14:00 h.) terá lugar un intercambio de experiencias aberto entre as autoras galegas convidadas e Salma. Traballarase tamén a creación de textos conxuntos.
  • A sesión de tarde (17:00 – 19:00 h.), aberta á cidadanía, comezará cunha mesa redonda, na que participarán Salma e outras autoras, e concluirá cun recital no que as convidadas compartirán a súa obra co público asistente (entre o que agardamos vervos!). Esta xornada terá lugar no Museo Liste (R/ Pastora nº 22, Vigo).
Chuzame! A Facebook A Twitter

Presentación de «Aníbal Otero. Lingüística e política en España na Guerra Civil e no franquismo», de Xesús Alonso Montero o próximo luns en Compostela

28 Abril 2011

Crónica,Presentacións

O próximo luns 2 de maio, ás 20:00 horas, terá lugar na libraría Couceiro de Santiago de Compostela (Praza de Cervantes, 6), en Camariñas, a presentación do libro Aníbal Otero. Lingüística e política en España na Guerra Civil e no franquismo, de Xesús Alonso Montero. O acto, organizado por Xerais e a libraría Couceiro, contará coa participación de Antón Santamarina, Manuel Bragado e Xesús Alonso Montero.

Chuzame! A Facebook A Twitter

O Espazo Tintimán protagoniza o Nadalxogo de Compostela

24 Decembro 2010

Animación á lectura,Eventos,Narrativa,Noticias,Tintimán,Xuvenil

O alcalde de Santiago coñeceu no serán de onte, os corazóns de chocolate! (e foi consciente de que son bombas calóricas) no Espazo Tintimán que se organizou no Nadalxogo de Santiago. Tamén informouse de quen é Tintimán (interpretado polo actor Alberto Rolán) e animoumo “a investigar esa seita”.

O programa de actividades do Espazo Tintimán en Nadalxogo pode descargarse aquí.

Chuzame! A Facebook A Twitter

«Todo é silencio», a presentación en Couceiro

26 Novembro 2010

Autores,Narrativa,Presentacións,Vídeos

Couceiro from Fernando Lema on Vimeo.

Eis o magnífico vídeo que preparou Fernando Lema do acto da presentación o pasado 14 de outubro na praza de Cervantes de Todo é silencio de Manuel Rivas, organizado pola Libraría Couceiro. Iria Peña canta o fado «Chaves da vida», acompañada nas guitarras por Miguel Ladrón de Guevara e Gastón Rodríguez.

Chuzame! A Facebook A Twitter

«Luz de Tebra», de Ánxel Vázquez de la Cruz, presentación en Compostela

5 Novembro 2010

Narrativa,Presentacións

O vindeiro xoves 11 de novembro, ás 20,00 horas na Aula Castelao da Facultade de Medicina e Ondontoloxía da USC, presentarase Luz de Tebra, o libro de relatos de Ánxel Vázquez de la Cruz. Acompañarán ao autor Xosé María Fraga, Manuel Sánchez Salorio, Dolores Vilavedra e o editor Manuel Bragado.

Chuzame! A Facebook A Twitter

«O coitelo en novembro», de Marilar Aleixandre, presentación o próximo xoves en Santiago

29 Outubro 2010

Autores,Narrativa,Noticias,Presentacións

O coitelo en novembro, a última novela de Marilar Aleixandre, será presentada o vindeiro xoves na libraría Couceiro de Santiago de Compostela.

O acto, que contará coa intervención de Víctor Freixanes, Manuel Bragado e a propia autora, terá lugar ás 20,00 horas, nas instalacións da librería Couceiro (Praza de Cervantes, 6, Santiago de Compostela).

Chuzame! A Facebook A Twitter

«Reescrituras do conto popular (2000-2009)» preséntase mañá en Compostela

7 Setembro 2010

Animación á lectura,Literatura_tradición_oral,Monografías,Noticias,Presentacións

Mañá mércores 9 de setembro, ás 13:00 horas será presentado na Biblioteca da Fundación Caixa Galicia de Santiago Reescrituras do conto popular (2000-2009), o volume que para este ano preparou LIJMI, a rede de investigación das Literanturas Infantís e Xuvenís do Marco Ibérico.

Chuzame! A Facebook A Twitter

«Reescrituras do conto popular»

30 Agosto 2010

Animación á lectura,Literatura_tradición_oral,Monografías,Noticias,Presentacións

Os membros da “Red Temática de Investigación sobre Literatura Infantil y Juvenil del Marco Ibérico” (LIJMI) reúnen neste volume un conxunto de estudos baixo o título Reescrituras do conto popular (2000-2009).

A partir dunha introdución teórica que desvela as claves da reformulación dos referentes populares tradicionais no período temporal escollido, seis traballos analizan as obras máis salientábeis que responden a eses criterios nas literaturas que abrangue o marco ibérico e tamén no ámbito iberoamericano. O volume complétase cunha selección de obras, que recolle un total de cen títulos, e mais cunha bibliografía descrita que acolle algunhas das achegas máis relevantes en relación coa literatura popular, cuxo obxectivo é facilitar o labor das persoas encargadas da mediación á hora de se achegar a este tema.

Cada un dos traballos vai escrito na lingua de procedencia ou da elección dos autores, co cal se pretende dar a coñecer as linguas do marco ibérico e iberoamericano. Só se traducen ao galego, por se editar en Galicia o libro, os orixinais vascos, pola dificultade de comprensión que ofrece esta lingua non románica, así como os apart-ados xerais do libro.

Reescrituras do conto popular será presentado o vindeiro 8 de setembro, ás 13:00 horas será presentado na Biblioteca da Fundación Caixa Galicia de Santiago. No acto participarán Pedro Lucas, Blanca Roig Rechou e o editor Manuel Bragado.

Chuzame! A Facebook A Twitter

«Reescrituras do conto popular (2000-2009»

12 Agosto 2010

Animación á lectura,Literatura_tradición_oral,Monografías,Noticias,Presentacións

O vindeiro 8 de setembro, ás 13:00 horas será presentado na Biblioteca da Fundación Caixa Galicia de Santiago Reescrituras do conto popular (2000-2009), o volume que para este ano preparou LIJMI, a rede de investigación das Literanturas Infantís e Xuvenís do Marco Ibérico.

Chuzame! A Facebook A Twitter

Pere Tobaruela hoxe en LITVI

21 Xuño 2010

Asinatura,Autores,Fóra de Xogo,Presentacións

Pere Tobaruela, autor d’ A cripta do Apóstolo, participa hoxe nas actividades de LITVI, o importante encontro internacional de literatura de viaxes que se celebra ao longo desta semana en Compostela. Tobaruela, que xa participou durante a semana pasada no programa «Os Autores no Camiño», presentou ás 12:00 horas a súa novela nas instalacións da feira e manterá a partir das 18:00 nas instalacións do Casino un café cos lectores e lectoras.

Chuzame! A Facebook A Twitter

«Un fito histórico para a visibilidade da literatura galega no mundo»

6 Xuño 2010

Antoloxía,Noticias,Presentacións,Traducións,Xerais_nos_medios

A maior parte dos medios recolleron hoxe a noticia da presentación da Anthology of Galician Literature realizada onte en Compostela na que interviron os responsables de Xerais e Galaxia, coeditores da obra, e Roberto Varela, conselleiro de Cultura e Turismo, entidade que apoiou esta edición. A obra, preparada por Jonathan Dunne recolle en edición bilingüe obras que van dende o século XII ata o ano 1981, datas para nada casuais pois abarcan dende o primeiro documento en galego que se conserva ata o Estatuto de Autonomía. Neste acto de presentación Manuel Bragado leu unha carta de Dunne, que non puido participar no acto por atoparse nestes momentos fóra de Galicia e, a súa vez, Víctor Freixanes, director da editorial Galaxia, a carta redactada polos editores que acompañará ao envío que da antoloxía se realizará a centros de estudos galegos, lusos e hispánicos, así como a axentes literarios e editoriais de todo o mundo.

Velaí como foi recollida a noticia:

Documentación de referencia:

Chuzame! A Facebook A Twitter

«Anthology of Galician Literature» presentación aos medios de comunicación

3 Xuño 2010

Antoloxía,Noticias,Presentacións,Traducións

Coeditada por Xerais e Galaxia, co apoio da Consellaría de Cultura e Turismo, na primeira quincena de xuño, chegará ás librerías o volume Anthology of Galician Literature 1196-1981, preparada por Jonathan Dunne e que recolle en edición bilingüe obras que van dende o século XII ata o ano 1981, datas para nada casuais pois abarcan dende o primeiro documento en galego que se conserva ata o Estatuto de Autonomía.

O libro será presentado en roda de prensa o vindeiro sábado, día 5, ás 12:00 horas na Sala de Xuntas da Consellería de Cultura en Santiago. No acto participarán Roberto Varela (Conselleiro de Cultura e Turismo), Víctor F. Freixanes (Director Xeral de Galaxia) e Manuel Bragado (Director Xeral de Xerais).

Literatura de tradición oral, literatura dramática, ensaio, poesía e narrativa de ficción son os xéneros neste volume recollidos e que servirá de carta de presentación da literatura de nós diante do mundo anglosaxón. Un fito para a edición galego.

Chuzame! A Facebook A Twitter

Marilar Aleixandre, «Letra E» da AELG, entrevista en «Galicia hoxe»

Autores,Entrevistas,Homenaxes

Marilar Aleixandre é entrevistada por Galicia hoxe con motivo dos actos de homenaxe «A escritora na súa terra» do sábado, 5 de xuño, en Compostela, no que recibirá a «Letra E» da Asociación de Escritores en Lingua Galega.

A homenaxe A Escritora na súa Terra, comezará ás 11:45 horas na Avenida de Barcelona, en Compostela, coa plantación dun abruñeiro e o descubrimento dun monólito conmemorativo, un acto no que intervirán o presidente da AELG, Cesáreo Sánchez, a secretaria xeral da asociación, Mercedes Queixas e o alcalde de Santiago, Xosé S. Bugallo. A partir das 13:00 horas, o Salón Nobre do Pazo de Raxoi acollerá a entrega da “Letra E” -unha peza escultórica do artista Silverio Rivas- a Marilar Aleixandre, sobre a que Ana Romaní lerá unha laudatio. A homenaxe rematará ás 14:30 horas no restaurante do hotel Palacio del Carmen cun xantar de confraternidade.

Chuzame! A Facebook A Twitter

Marilar Aleixandre: «A escritora na súa Terra», 5 de xuño en Compostela

31 Maio 2010

Autores,Homenaxes

O sábado 5 de xuño a Asociación de Escritores en Lingua Galega celebra a XVI Edición “O/A Escritor/a na súa Terra”, recaendo este ano na figura de Marilar Aleixandre, que será homenaxeada en Santiago de Compostela.

Os actos da homenaxe comezarán ás 11:45 horas coa plantación dun abruñeiro e a descuberta dun monolito preto da rúa Barcelona. Continuarán ás 13:00 horas no Salón Nobre do Pazo de Raxoi co acto de entrega da Letra E, no que intervirá Ana Romaní como mantedora literaria. Rematarán ás 14:30 horas cun xantar de confraternidade nas instalacións do Hotel Palacio del Carmen (rúa das Oblatas).

As persoas que desexen acompañar a Marilar no xantar de confraternidade deben reservar o seu cuberto até hoxe luns 31 chamando á secretaría da AELG (Tlf./Fax: 981 133 233).

Poden baixarse en pdf o programa e o cartel da homenaxe.

Chuzame! A Facebook A Twitter

«En castellano no hay problema», ecos da presentación nacional nos medios

9 Maio 2010

Crónica,Noticias,Presentacións,Xerais_nos_medios

Vieiros, A Nosa Terra e GzNación fanse eco hoxe da presentación na Feira do Libro de Santiago de En castellano no hay problema, o libro de Carlos Callón publicado en Crónica. Grazas a todos eles.

As presentacións deste libro proseguirán esta semana na Universidade de Vigo, o mércores 12 no salón de Actos da Facultade de Filoloxía e Tradución ás 12:00 horas; en  Ribeira, o xoves 13 de maio, ás 20:30 horas na Aula da Rede de Dinamización; en Paiosaco, o venres 14 de maio ás 20:30 horas; e en Corcubión, o sábado 15 de maio.

Chuzame! A Facebook A Twitter

«En castellano no hay problema» de Carlos Callón, presentación en Compostela

6 Maio 2010

Crónica,Lingua,Noticias,Presentacións

O vindeiro sábado, 8 de maio, ás 19:00 horas, terá lugar na Feira do Libro de Compostela a presentación do libro de Carlos Callón En Castellano no hay problema. Noa cto acompañarán ao autor Caetano Díaz (director de Galicia hoxe), Pilar García Negro (profesora da UDC) e  o editor Manuel Bragado. Na promoción da presentación colaboran A Asociación Cultural O Galo e a Mesa Pola Normalización Lingüistica.

Cun título que desde o comezo pretende provocar a reflexión, Carlos Callón une neste libro textos que abordan a situación do idioma galego nos últimos tres lustros, deténdose con máis vagar na política lingüística do período do bipartito e do comezo da lexislatura de Alberto Núñez Feijóo. Nestas páxinas o autor, ademais de rebater con argumentos algúns dos prexuízos e tópicos máis asentados contra a lingua galega, analiza a situación do idioma, repasa reivindicacións, presenta alternativas, convida ao protagonismo individual para transformar a sociedade e alerta das medidas que deberían adoptar os poderes públicos. En castellano no hay problema é, en definitiva, un libro útil e operativo para a encrucillada en que se encontran a nosa lingua e a nosa cultura.

Esta primeira presentación en Compostela dá inicio a unha rolda de acto arredor do libro de Carlos Callón que proseguirá na seguinte semana na Universidade de Vigo, o mércores 12 no salón de Actos da Facultade de Filoloxía e Tradución ás 12:00 horas, en  Ribeira, o xoves 13 de maio, ás 20:30 horas na Aula da Rede de Dinamización, e en Paiosaco, o venres 14 de maio ás 20:30 horas.

Chuzame! A Facebook A Twitter

«Os Celtas» de Francisco Calo, presentación en Compostela

5 Maio 2010

Historia,Noticias,Presentacións

O venres, 7 de maio, a partir das 20:00 horas será presentado na Feira do Libro de Compostela o ensaio de Francisco Calo Lourido Os Celtas. Unha (re)visión dende Galicia. No acto acompañarán ao autor Xerardo Pereira-Menaut, Catedrático de Historia Antigua da USC e o editor Manuel Bragado.

Fuxindo dos tópicos e das repeticións miméticas do que se escribiu sobre o celtismo europeo, Francisco Calo realiza neste ensaio unha profunda revisión sobre esta cuestión no país noso. Galicia ten unha personalidade propia e diferenciada desde a Prehistoria, polo que o estudo do seu devir histórico precisa dun tratamento específico. Partindo da premisa de que o celta é, primo et per se, unha cuestión de lingua, faise un percorrido polo campo do indoeuropeo, polo Hallstatt e La Tène, tratados como culturas arqueolóxicas, así como polas actuais teorías científicas peninsulares, para rematar entrando en Galicia. Repásase, aquí, a historiografía de precursores e románticos sobre celtas e analízanse as fontes clásicas que fan referencia á Terra. Dedícase un denso capítulo á fulcral cuestión lingüística e outro á sociedade e a relixión no resto de España e en Galicia, sempre procurando as posibles semellanzas e diferenzas. Faise tamén unha incursión na materia de Bretaña, polo achegamento céltico medieval que puido significar e compárase a arte peninsular dos pobos ibéricos, da Meseta e galaicos, para rematar cun achegamento aos aspectos etnográficos que, de xeito superficial e mistificador, figuran nas publicacións sobre celtas. Ilustra o libro un completo aparato gráfico, elaborado ad hoc polo autor, así como unha bibliografía ampla, actualizada e en versión orixinal dos diferentes países europeos nos que se investiga a presenza ou ausencia de celtas.

Chuzame! A Facebook A Twitter

«”Níxer”: crónicas para un país silenciado»

29 Abril 2010

Autores,Crónica,Entrevistas,Presentacións,Xerais_nos_medios

Acción Contra a Fame e Xerais publican Níxer, un libro solidario sobre o país africano

Sobre os países dese Terceiro Mundo tan afastado para as nosas latitudes só se fala cando hai grandes traxedias que conmoven a Occidente coas imaxes dunha explosión de dor. Cando esa explosión se apaga, o silencio cóbreo todo e o sufrimento segue aí. Quizais ese é o caso de Níxer, un país que sae intermitentemente nos xornais cando hai unha desgraza puntual, xa sexa un golpe de estado ou unha seca. Pero os males endémicos, os que permanentemente sacoden un país que morre por inanición, quedan fóra da tinta dos periódicos e dos obxectivos das cámaras. «Xa sabemos que o habitual non é noticia», explica o xornalista Camilo Franco, que onte presentou xunto co pintor Alfonso Costa e o escritor Francisco Fernández Naval a obra Níxer, editada por Xerais e cuxos dereitos de autor das vendas serán cedidos na súa totalidade á Acción Contra a Fame e Cultura Solidaria Galega.

Esta obra que ve agora a luz é o resultado dunha viaxe organizada por Acción Contra a Fame hai catro anos a Níxer. «A viaxe serviu para que cada un de nós fixese crónicas cada día sobre o que acontecía nun país no que, como se lembra no libro, de cada cen nenos catorce non chegan os oito anos. A xente alí morre por pura fame. Esa viaxe era a escusa para poder contar un país», lembra Camilo Franco.

Nese intento de «contar un país», o libro recolle o punto de vista de tres autores diferentes. Por unha banda, están as dúas crónicas elaboradas por Camilo Franco e por Fernández Naval e, pola outra, un traballo máis poético –no que se mesturan imaxes e debuxos– elaborado por Alfonso Costa. Ademais, o libro presentado onte inclúe un texto elaborado polo autor do país africano Moustapha Bello Marka. «Cando viaxamos a Níxer, tivemos un encontro con artistas, entre os que estaba este escritor, que xa colaborou con nós na revista da Cultura Solidaria Galega», sinala Fernández Naval.

A asociación Cultura Solidaria Galega naceu hai xa seis anos despois de que a axencia Acción contra Fame organizase no anterior Ano Santo unha peregrinación con fotógrafos e xornalistas. Aí xurdiu unha asociación que hoxe en día segue a colaborar principalmente con esta ONG.

«TODO EMPEORA»

Daquela viaxe pasaron xa catro anos, pero a realidade do país africano continúa sen mellorar. «A situación non fixo máis que empeorar. Dende a viaxe, hai xa catro anos, até agora a realidade non mellorou. A ONU alertou hai pouco do perigo dunha nova pandemia de fame», lamenta Francisco Fernández Naval. Níxer continúa así a ser un terreo vougo abandonado e no que só as ONG se preocupan de sementar. «Nesa difícil situación, a gran parte da poboación vive con resignación, aínda que non sei se definilo exactamente como resignación. Quizais aceptan a situación como algo que lles toca vivir e aceptan con frialdade a morte. Quizais é unha falta de rebeldía ou, se cadra é que entenden o sentido da vida mellor ca nós», reflexiona Camilo Franco. Sexa como sexa, os autores de Níxer reflicten sen resignación un de tantos países esquizos por Occidente. Alberto Ramos

Texto de Alberto Ramos publicado en Xornal de Galicia o 29 de abril de 2010 con motivo da presentación en Santiago do libro Níxer.

Chuzame! A Facebook A Twitter

«Settecento» de Marcos Calveiro, primeiro capítulo

23 Abril 2010

Adiantos_para_ler,Descargas,Narrativa,Noticias,Presentacións

Tras o éxito que obtivera con Festina lente, Marcos Calveiro volve con Settecento visitar a Compostela doutrora, desta volta da man do mesmísimo Antonio Vivaldi, unha novela que constitúe un intrigante e vertixinoso relato que o confirma como un dos novelistas primeiros do noso tempo.

Settecento será presentada no Auditorio David Russell do Conservatorio Profesional de Música de Vigo, o vindeiro martes, 27 de abril, a partir das 19:30 horas, nun acto que contará coa participación do autor, de Manuel Candelas (Arume dos piñeiros) e da Orquestra de Corda «CMUS Profesional de Vigo», dirixida por Edita Shulman, que interpretará o concerto «Alla Rustica» de Antonio Vivaldi.

O Primeiro de maio, Calveiro pronunciará ás 13:00 horas o pregón que abre a Feira do Libro de Santiago, que se celebrará do 1 ao 9 de maio no Paseo central da Alameda compostelá. O mesmo día, ás 20:00 horas, presentarase Settecento nun acto no que Martín Pawley conversará sobre a novela con Marcos Calveiro.

O primeiro capítulo desta formidable novela pode baixarse en pdf aquí. Boa lectura e bo Día do Libro!

Chuzame! A Facebook A Twitter

Xerais na Feira do Libro de Santiago

22 Abril 2010

Crónica,Feiras_do_libro,Fóra de Xogo,Historia,Narrativa,Noticias,Poesía,Xuvenil

Xerais preparou un importante programa de actividades para a Feira do Libro, que se celebrará no Paseo Central da Alameda de Santiago de Compostela, entre o 1 e o 9 do vindeiro mes de maio.

Día 1 sábado

13:00 horas: Pregón a cargo de Marcos Calveiro.
19:30 horas: Ricardo Gurriarán asinará exemplares do seu último libro Inmunda escoria.
20:00 horas: Presentación da novela Settecento de Marcos Calveiro. Intervirán: Martin Pawley, Manuel Bragado e Marcos Calveiro.

Día 3 luns

19:30 horas: Rosa Aneiros asinará exemplares dos seus libros de Sol de Inverno (PREMIO XERAIS DE NOVELA 2009) e Ás de bolboreta (PREMIO FUNDACIÓN CAIXA GALICIA 2009)

Día 4 martes

20:00 horas: Presentación da novela A intervención de Teresa Moure. Intervirán: Margarita Ledo, Manuel Bragado e Teresa Moure.

Día 5 mércores

19:00 horas: Presentación do poemario (Retro)visor de Antía Otero. Intervirán: Estevo Creus, Fran Alonso e Antía Otero.

Día 6 xoves

20:00 horas: Presentación da novela Denso recendo a salgado de Manuel Portas. Intervirán: Rosa Aneiros, Xosé A. Sánchez Bugallo, Manuel Bragado e Manuel Portas. Ao remate, a música Clara Pino (Integrante de Cobalblue), tocará coa Harpa Celta o tema “Alalá do viquingo”.

Día 7 venres

20:00 horas: Presentación do libro Os Celtas. Unha (re)visión dende Galicia de Francisco Calo Lourido. Intervirán: Xerardo Pereira-Menaut (Catedrático de Historia Antigua da USC), Manuel Bragado e Francisco Calo Lourido.

Día 8 sábado

19:00 horas: Presentación do libro En castellano no hay problema de Carlos Callón. Intervirán: Caetano Díaz (Director de Galicia Hoxe) e Pilar García Negro. Colaboran a Asociación Cultural O Galo e A Mesa.

Chuzame! A Facebook A Twitter

«Un misterio para Tintimán», nace un xove detective galego da man de Jaureguízar

12 Abril 2010

Tintimán,Xuvenil

A finais desta semana chegarán ás librarías os primeiros exemplares das dúas primeiras novelas coas que se dá a coñecer Tintimán, o xove detective galego creado por Jaureguízar: Corazón de chocolate. Un misterio para Tintimán en Compostela e A coroa de Napoleón. Un misterio para Tintimán na Coruña. Tintimán, un rapaz de dezaseis anos arrichado e algo insolente, herdou do seu pai a paixón por investigar misterios, o amor pola aventura e un axitado traballo de xornalista. Ambos os dous títulos foron ilustrados por Matalobos e foron editados de forma moi atractiva en flexibook.

En Corazón de chocolate, a cidade de Santiago de Compostela é un escenario emocionante e arriscado para o primeiro misterio que ten que descubrir Tintimán. O reporteiro investigará se realmente existe a Irmandade Xelmírez, unha seita perversa, ou se só é unha lenda. Señor Grozni, un gato cun parche nun ollo, e Mónica, unha amiga que asegura ser a súa moza, achegaranlle a axuda precisa para que Tintimán descubra a verdade.

Esta segunda entrega da serie protagonizada por Tintimán está ubicada na Coruña, cidade que asiste horrorizada a un incidente de consecuencias internacionais: desapareceu unha coroa de Napoleón que o goberno francés lle emprestara á cidade para conmemorar o bicentenario da Batalla de Elviña. A xoia debe aparecer inmediatamente e de xeito discreto para evitar un conflito diplomático. Soamente un reporteiro coa coraxe de Tintimán, axudado por Señor Grozni, o seu gato torto, e por Mónica, unha compañeira de clase que asegura ser a súa moza, poderá descubrir o acontecido.


Chuzame! A Facebook A Twitter

«Melancolía de sofá» de Luisa Castro, presentación hoxe en Compostela

25 Marzo 2010

Crónica,Noticias,Presentacións

Hoxe ás 20:00 horas presentarase na libraría Couceiro de Santiago (praza de Cervantes) o libro de Luisa Castro, Melancolía de sofá. No acto acompañarán á autora o profesor Roberto Blanco Valdés e o editor Manuel Bragado.

Chuzame! A Facebook A Twitter

«O único que queda é o amor» e «A noite do risón» incluídos na Lista de Honra do IBBY 2010

3 Marzo 2010

Noticias,Premios,Traducións,Xuvenil

Forest Zhang, director de Administración do IBBY, comunicou a editorial a inclusión na Lista de Honra do IBBY 2010 d’ O único que queda é o amor de Agustín Fernández Paz e d’ A noite d’ O Risón de Gonzalo Moure pola calidade da tradución realizada por Ignacio Chao. Ambos os dous títulos foron publicados a finais do ano 2007 na colección xuvenil ilustrada. Os diplomas serán entregados a Agustín Fernández Paz e Ignacio Chao o 9 de setembro de 2010, na sesión que se celebrará no Palacio de Congresos de Galicia dentro das actividades do Congreso Internacional do IBBY que, por vez primeira, se celebrará en Galicia.

O único que queda é o amor de Agustín Fernández Paz, ilustrado por Pablo Auladell é un dos libros máis premiados e recoñecidos dos publicados en Galicia durante os últimos anos. Reeditado en cinco ocasións, con anterioridade a súa inclusión na Lista de Honra do IBBY, recibiu o Premio Xosé Neira Vilas ao Libro Infantil e Xuvenil do ano 2007, o Premio Asociación de Escritores en Lingua Galega (Infantil-Xuvenil), 2007, o Premio Literario Frei Martín Sarmiento (3º ESO a Bacharelato), o Premio Nacional de Literatura Infantil e Xuvenil 2008 .

A noite d’ O Risón de Gonzalo Moure é unha trepidante novela breve na que un fato de mariñeiros atrapados polo temporal e varias personaxes misteriosas, comezan a contar historias sobre tormentas, naufraxios e mortos. Acollida con entusiasmo polos mediadores, a crítica axiña salientou a calidade da tradución de Ignacio Chao, na que se fixo un magnífico traballo coa linguaxe popular mariñeira.

Os nosos parábens para Agustín Fernández Paz e Ignacio Chao por tan importante recoñecemento.

Chuzame! A Facebook A Twitter

«Mal de escola» de Daniel Pennac, premio Spinoza de ensaio

1 Decembro 2009

Ensaio,Premios,Traducións,Xerais_nos_medios

Onte o xurado do Premio Spinoza de ensaio, formado por alumnado do Insituto Rosalía de Castro de Santiago, anuncio que Mal de escola de Daniel Pennac foi a obra gañadora da primeira edición deste premio. A obra, traducida para o galego por Xavier Senín e Isabel Soto, foi editada por Xerais no pasado mes de outubro, sendo reeditada a comezos deste ano 2009. Recollemos o texto da noticia preparada por A. Iglesias e publicada por Galicia hoxe sobre a concesión do premio:

Reivindicar o filósofo Bento Spinoza como “o pensador máis extraordinario do século XVII” e, ao mesmo tempo, “fomentar a lectura do ensaio entre os máis novos” eran dous dos obxectivos que perseguía a dirección do instituto Rosalía de Castro desde había algún tempo. A fórmula que se utilizou para conseguir ambas as premisas foi a mesma que a empregada no Certame Literario Arcebispo Juan de San Clemente, cuxos quince anos de extraordinaria acollida entre alumnos e escritores pon de manifesto o seu máis que probado éxito. Así, os estudantes de cinco institutos de Secundaria de Galicia volveron converterse en xuíces lectores, elixindo nesta ocasión o mellor ensaio do ano, que non é outro que Mal de escola, do francés Daniel Pennac, tal e como deu onte a coñecer o xurado do certame, que este ano celebra a súa primeira edición. O libro aborda a cuestión da escola e a educación desde un punto de vista insólito, o dos malos alumnos. Con humor e tenrura, análises críticas e fórmulas efectivas, Pennac, un prestixioso escritor e “pésimo estudante” na súa época, como el mesmo confesa, ofrece unha brillante lección de intelixencia, mesturando recordos autobiográficos e reflexións acerca da pedagoxía e as disfuncións da institución escolar, a dor de ser un mal estudante e a sede de aprendizaxe, o sentimento de exclusión e o amor ó ensino. Mal de escola é, ademais, a historia dunha metamorfose, de como un mal alumno chega a ser profesor e máis adiante un escritor recoñecido. A “identificación coa visión do estudante que presenta o autor en primeira persoa e en pequenos capítulos a modo de relatos para facilitar a súa lectura” é un dos motivos da súa elección polo xurado que destaca que “todas as accións que realiza e as vivencias que experimenta o autor nos serven coma referencia para a nosa vida de estudantes”.

Chuzame! A Facebook A Twitter

«A fráxil existencia», mesa redonda do Club de Lectura Tendendo Redes de Gálix

25 Novembro 2009

Autores,Mesa Redonda,Noticias,Xuvenil

Mañá xoves, 26 de novembro de 2009, nas instalacións do Consello da Cultura Galega de Santiago, entre ás 17:00 e as 19:00 horas terá lugar unha mesa redonda arredor da temática «A fráxil existencia». No acto, que forma parte das actividades do Club de Lectura Tendendo redes de Gálix e e será moderado por Ánxela Gracián, participarán Concha Blanco, Marcos Calveiro e Rosa Aneiros.

Chuzame! A Facebook A Twitter

«Ás de bolboreta»: narracións abertas

19 Novembro 2009

Crónica,Fóra de Xogo,Premios_Xerais,Presentacións,Xerais_nos_medios,Xuvenil

Dolores Martínez Torres publica en «Faro da Cultura» unha crítica sobre Ás de bolboreta, a novela de Rosa Aneiros gañadora do Premio Fundación Caixa Galicia de literatura xuvenil 2009. Baixo o título de «Narracións abertas» e o subtítulo «Con lirismo certeiro», o texto salienta a estrutura no lineal, fragmentada dunha novela que presenta aos lectores e lectoras novas «unha técnica narrativa diferente, ao tempo que leva a reflexionar sobre as variables que interveñen na construción da realidade e, polo tanto, invita aos lectores a interpretar a lexitimidade das accións descritas, segundo o valor moral que lles queiran conceder aos motivos e circunstancias que as condicionan. A páxina onde aparece publicado o texto completo da crítica pode baixarse en pdf aquí.

Ás de bolboreta preséntase hoxe por vez primeira ás 19:30 horas nas instalacións da Biblioteca da Fundación Caixa Galicia de Santiago. No acto acompañarán a Rosa Aneiros, o director da biblioteca Pedro Lucas e o editor de Xerais Manuel Bragado.

Chuzame! A Facebook A Twitter

«Ás de bolboreta», Premio Fundación Caixa Galicia, primeira presentación

17 Novembro 2009

Fóra de Xogo,Noticias,Premios_Xerais,Presentacións,Xuvenil

O vindeiro xoves, 19 de novembro, ás 19:30 horas, nas inatalacións da Biblioteca da Fundación Caixa Galicia (rúa Frei Rosendo Salvado 14-16) de Santiago realizarase a primeira presentación da novela Ás de bolboreta de Rosa Aneiros, premio Fundación Caixa Galicia de literatura xuvenil 2009. No acto acompañarán á autora o editor Manuel Bragado e o director da Biblioteca Pedro Lucas.

Chuzame! A Facebook A Twitter

«Sete palabras» de Suso de Toro, tertulia de presentación en Santiago

15 Novembro 2009

Natureza,Noticias,Presentacións

O vindeiro martes, 17 de novembro, ás 20:00 horas na Galería Sargadelos de Santiago (Rúa nova 16) no seo dunha tertulia presentarse Sete palabras, a novela máis recente de Suso de Toro. Na tertulia participarán  Xosé Luís Axeitos, secretario da Real Academia Galega; Xosé Manuel Villanueva, escritor; Antonio Raúl de Toro, catedrático de literatura inglesa; Antonia Doce, Manuel Bragado e o autor,

Chuzame! A Facebook A Twitter

«Sol de Inverno», presentación en Compostela

11 Novembro 2009

Narrativa,Noticias,Premios_Xerais,Presentacións

O vindeiro xoves, 12 de novembro, ás 20:00 horas, nas instalacións da Libraría Couceiro de Santiago (praza de Cervantes 6) presentarase Sol de Inverno, a novela de Rosa Aneiros gañadora do Premio Xerais 2009. Acompañarán á autora, a xornalista Helena Soto e o editor Manuel Bragado.

Chuzame! A Facebook A Twitter

«Pedras de Compostela», presentación en Santiago

3 Novembro 2009

Historia,Noticias,Presentacións

O mércores, 4 de novembro, ás 20:00 horas, na Libraría Couceiro de Santiago (praza de Cervantes 6) presentarase Pedras de Compostela de Aldonza de Praterías. No acto participarán Mercedes Gualteria Pintos, Xosé María Díaz, Ramón Villares e Manuel Bragado.

Chuzame! A Facebook A Twitter

Sobre Aldonza de Praterías

24 Outubro 2009

Autores,Entrevistas,Historia,Noticias,Xerais_nos_medios

César Lorenzo entrevista n’ A Nosa Terra á escritora Mercedes Gualteria Pintos amanuense das reflexións de Aldonza de Praterías recollidas no libro Pedras de Compostela.

Quen é Aldonza de Praterías?

A autora deste libro. Eu só me limitei a transcribir os seus pensamentos porque ela ten as mans ocupadas. En realidade, quen eu e Bieito Iglesias bautizamos co nome de Aldonza é a escultura do pórtico da praza das Pratarías da catedral de Santiago que se coñece como A Adúltera. Eu sempre tiven querenza por esa figura e deime de conta de que, tanto pola súa idade (está alí desde o 1105) como pola súa posición (nun lugar privilexiado para o ver todo) fora testemuña excepcional da vida cotiá da cidade nos últimos 900 anos. Como é unha gran descoñecida para composteláns e visitantes, o meu obxectivo último coa sección era dala a coñecer. Esta figura está considerada polos especialistas como unha das mellores esculturas do románico europeo e formaba parte do que podemos chamar precedente do cómic, feito en pedra. O bispo Diego Xelmírez cada venres impartía xustiza nas Pratarías. Detrás del, a catedral explicaba cal era o destino dos xustos e dos descarriados. Aldonza era unha desas, condenada ao inferno.

Na man ten unha caveira.

O Códice Calixtino conta que representa unha muller adúltera que foi descuberta polo seu marido xunto ao amante. A el cortoulle a cabeza e agora ela padece no Inferno, condenada a levar no colo a caveira do querido.

Un dos fíos do libro é a análise do papel da muller na arte relixiosa.

A patrística deseñou a simboloxía que logo os canteiros levaron á pedra. As mulleres dividíanse en dúas figuras: as virxinais, as nais, puras e castas; e o resto, as figuras case diabólicas que arrastraban o home ao pecado. Para os doutores da Igrexa o sexo era a peor cousa do mundo. O abade de Cluny Odón afirmaba: “Se os homes visen o que hai debaixo da pel, a visión das mulleres daríalles náuseas”. Á parte da Adúltera, hai dúas esculturas dignas de ver, Eva aleitando a Caín e a Vulva, cuxa imaxe se reproduce no libro. Con todo, esta misoxinia estaba presente en toda a sociedade. Até hai 35 anos, as mulleres estaban equiparadas aos tolos e aos nenos e o propio Concello de Santiago publicou varios editos prohibindo que as mulleres vivisen soas.

Dous libros considera vostede fundamentais para entender o pasado de Santiago: a Historia Compostelana e o Códice Calixtino. Seguen a ter interese ?

A Historia Compostelana mandoulla facer Xelmírez a varios clérigos e é pura propaganda do seu mandato. Pero é moi divertida porque está repleta de aventuras e é útil para o investigador porque conta polo miúdo até o prezo da comida no mercado. O Calixtino ten moitas virtudes. É a primeira guía turística da cidade, conta moitos mitos e describe tan ben a catedral que incluso se pensou que partes alí descritas, que nunca existiron, desapareceran incomprensibelmente.

No libro cóntanse moitas lendas e historias, en troques a catedral e o Camiño de Santiago teñen hoxe un aire un tanto tópico.

Pois no 2010 teremos outra ración de libros sobre o tema!! E a maioría non valerá para nada, refritos de refritos cheos de tópicos. O problema é que máis dun pensa que o Camiño de Santiago o inventou Manuel Fraga. Xa no século XIII a lembranza de máis éxito  entre os peregrinos era a vieira. E había tantos que o cabido fixou en 100 o número de tendas que podían vender as cunchas (naturais, de prata, de ouro…), das que 27 eran da súa propiedade. Santiago ten dez séculos de experiencia no turismo e xa vivimos todo, o bo (o esforzo dos conventos por darlles aloxamento aos peregrinos) e o malo (os asaltos na ruta ou a picaresca de comerciantes e veciños).

Tamén conta no libro que algúns ritos son invencións ben modernas.

O máis flagrante, o do Santo dos Croques. A figuriña que hoxe a maioría considera representación do Mestre Mateo era chamada Compostela até que Neira de Mosquera escribiu un libro que eu considero dos máis nefastos da historia. Entre outras barbaridades, inventou o costume de ir petar na testa desa estatua. De aí vén o Santo dos Croques, da mente dun escritor do século XIX, convertido hoxe na obsesión dos turistas, que xa non só se contentan con colocaren os cinco dedos no aliviadeiro do pórtico senón que buscan canto oco hai para meteren os pés, a cara. Ás veces, esa ansia por ritualizar a visita a Santiago é graciosa. Contoume unha monxa, que axuda no coidado da catedral, que certo día pasou pola nave central co balde dun deshumidificador, que levaba para vazar. Pois ben, de socato, a xente empezou a arremuiñarse para meter a man e persignarse con aquela agua, pensando que era bendita!

Que libro recomendaría para quen lle guste o Camiño?

Levo anos pregando para que se reedite El Camino de Santiago, de Walter Starkie, publicado por Aguilar no 1958. É unha viaxe ao pasado máis recente moi vívida e moi ben documentada.

Pedras de Compostela será presentado o día 4 de novembro ás 20:00 horas na Libraría Couceiro de Santiago, nun acto no que acompañarán a Mercedes Pintos, Ramón Villares, José María Díaz e Manuel Bragado.

Chuzame! A Facebook A Twitter

An Alfaya no Club de Lectura de Gálix

22 Outubro 2009

Autores,Clubs_de_lectura,Fóra de Xogo,Narrativa,Noticias

Chuzame! A Facebook A Twitter

«Pirata», presentación en Compostela

12 Outubro 2009

Narrativa,Noticias,Presentacións

O vindeiro mércores, 14 de outubro, ás 20:00 horas, na Libraría Couceiro de Santiago presentarase Pirata, a máis recente novela de María Reimóndez. Acompañarán á autora o músico Xabier Díaz e a escritora Marilar Aleixandre.

Chuzame! A Facebook A Twitter

Xerais no Festigal 2009

24 Xullo 2009

Ensaio,Presentacións

194-f-cartaz350Hoxe no seo de Festigal realizaranse as presentacións de dous dos nosos libros da colección de ensaio: ás 18:00 horas O natural é político de Teresa Moure e ás 19:30 Nos camiños do entusiasmo de Goretti Sanmartín. En senllos actos as autoras estarán acompañadas polo editor Manuel Bragado.

Chuzame! A Facebook A Twitter

Marcos Calveiro, entrevista en "Xornal de Galicia"

8 Xullo 2009

Autores,Entrevistas,Narrativa,Xerais_nos_medios

2009070723275918522Tras a moi exitosa actividade da pasada semana en Santiago arredor da novela Festina lente, Marcos Calveiro é entrevistado en Xornal de Galicia.

Chuzame! A Facebook A Twitter

"Cartas de republicanos galegos condenados a morte", presentación en Santiago

2 Xullo 2009

Crónica,Noticias,Presentacións

XG00166101O vindeiro mércores, 8 de xullo, ás 20:00 horas, na libraría Couceiro (Praza de Cervantes 6) de Santiago de Compostela terá lugar a presentación do libro de Xesús Alonso Montero Cartas de republicanos galegos condenados a morte (1936-1948). No acto o autor estará acompañado do editor Manuel Bragado.

Chuzame! A Facebook A Twitter

Canteiro en Compostela con "Festina lente"

23 Xuño 2009

Clubs_de_lectura,Historia,Narrativa,Noticias

XG00139001O club de lectura Gálix Tendendo Redes remata a súa primeira andaina de actividades cun programa arredor da novela  Festina lente de Marcos Calveiro, organizado en colaboración coa asociación Amigos del Románico.

As actividades inícianse o día 2 de xullo no Consello da Cultura Galega, cunha lectura colectiva da novela a partir das 17:00 horas e  cunha conferencia, a partir das 19:00 horas, de  Carlos Sastre, experto en iconografías medievais, renacentistas, modernas e contemporáneas establecerá as claves entre arte e literatura ao longo da Historia.
O día 4 de xullo, sábado, desenvolvarase unha xornada artístico-literaria polos escenarios de Festina lente en Santiago de Compostela, así como cunha actividade de Bookcrossing, patrocinada por Edicións Xerais de Galicia, na que se deixarán en variados escenarios da zona vella de Santiago de Compostela exemplares da novela de Calveiro e doutras tanto dos autores escollidos este ano no club de lectura como doutros pertencentes á literatura xuvenil galega. Rematará a xornada cun recital poético que leva como lema “Canteiro en Compostela”, no cal moitas das nosas poetas e moitos dos nosos poetas labrarán con palabras a beleza da cidade pedra.

Para participar nas actividades do día 4 de xullo cómpre inscribirse enviando un correo  a galix@galix.org, anxelagracian@hotmail.com, tuiverde@gmail.com ou tendendorredes@gmail.com

Aconsellamos baixar o programa en pdf dende aquí.

Chuzame! A Facebook A Twitter

"Recordar doe",

11 Xuño 2009

Crónica,Homenaxes,Presentacións

Recordar doe .inddOrganizada pola Asociación de Veciños Raigame de Santiago, o venres, 12 de xuño, ás 20.00 horas, nas instalacións do Centro socio cultural O Ensanche (Frei Rosendo Salvado 16) de Santiago, celebrarase unha homenaxe ao profesor Herminio Barreiro e presentación do seu libro Recordar doe. No acto participarán Xaquín Mato (presidente de Raigame), Fran Alonso e Herminio Barreiro.

Chuzame! A Facebook A Twitter

«O libro das viaxes imaxinarias», premio AELG 2009

10 Maio 2009

Noticias,Premios,Xuvenil

librodasv1No seo da cea anual organizada en Santiago por AELG foron entregados os premios AELG á mellor produción literaria do ano 2008. Entre as numerosas obras finalistas editadas por Xerais, O libro das viaxes imaxinarias de Xabier DoCampo, ilustrado por Xosé Cobas, resultou o gañador na categoría do mellor libro infantil e xuvenil. Este é o terceiro premio que acada esta obra que xa recibira o Premio Isaac Díaz Pardo ao Libro Ilustrado do Ano 2008, outorgado polo Asociación Galega de Editores e o premio «Fervenzas literarias» ao mellor libro infantil e xuvenil de 2008.

Tamén foron premiados Teresa Moure na categoría de mellor libro teatral de 2008 por Unha primvera para Aldara (que será publicado por Xerais no vindeiro mes de setembro na colección «Fóra de Xogo») e Marcos Valcárcel polo seu traballo en «Uvas na solaina», elixido como mellor blog literario de 2008.

Os nosos parabéns aos premiados.

Chuzame! A Facebook A Twitter

DoCampo e Cobas asinan na Feira do Libro de Santiago

5 Maio 2009

Feiras_do_libro,Noticias

laparejaXabier DoCampo (gañador do Premio Irmandade do Libro 2008 da Federación de Libreiros de Galicia) e Xosé Cobas, autor e ilustrador d’ O libro das viaxes imaxinarias,  asinarán mañá, mércores, 6 de maio, a partir das 20:00 horas, na Feira do Libro de Santiago.

Chuzame! A Facebook A Twitter

«Baldras, o xigante», presentación na Feira do Libro de Santiago

4 Maio 2009

Merlín,Noticias,Presentacións

359818463_9bff2b3385_mMañá, martes 5 de maio, ás 18.00, na Feira do Libro de Santiago  Iolanda Eiras presenta o seu libro Baldras o xigante, publicado na colección Merliño.  No acto, actuará o coro A Ferradura, do CEIP Pío XII de Santiago de Compostela e unha sección da Banda Artística de Merza.  Ao remate do acto, a escritora asinará exemplares do seu libro.

Chuzame! A Facebook A Twitter

Manuel Rivas na Feira do Libro de Santiago

3 Maio 2009

Autores,Crónica,Feiras_do_libro,Infantil

verfotoaspMañá luns, 4 de maio, ás 19:00 horas, Manuel Rivas ofrecerá un recital poético.  Ao remate asinará exemplares de  O sombreiro ChichiriteiroA corpo aberto e do resto da súa obra.

Chuzame! A Facebook A Twitter

«Ramón Piñeiro. Os días ocultos», presentación en Santiago

2 Maio 2009

Narrativa,Noticias,Presentacións

10002949313Daniel Ameixeiro presentará mañá domingo, 3 de maio, ás 19:00 horas na Feira do Libro de Santiago a súa novela Ramón Piñeiro. Os días ocultos. No acto estará acompañado do editor Manuel Bragado.

Chuzame! A Facebook A Twitter

«O arco da vella», presentación na Feira do Libro de Santiago

Infantil,Merlín,Noticias,Presentacións

10002827513Mañá domíngo, 3 de maio, ás 18:00 presentarase O arco da vella, o álbum da serie «Merliño» escrito por Charo Pita e ilustrado por Xosé Tomás. A autora fará unha sesión de contacontos dirixida aos lectores novos arredor do do libro.

Chuzame! A Facebook A Twitter

Mar Guerra asina na Feira do Libro de Santiago

1 Maio 2009

Autores,Feiras_do_libro,Merlín

1729405wMar Guerra asinará exemplares de Xenaro ou o misterio da mochila verde na Feira do Libro de Santiago o sábado, 2 de maio, ás 18:30 horas.

Chuzame! A Facebook A Twitter

Jaureguizar asina «O Globo de Shakespeare»

30 Abril 2009

Autores,Feiras_do_libro,Narrativa,Noticias

j_224514Jaureguizar asinará exemplares d’ O Globo de Shakespeare, na Feira do Libro de Santiago, o venres, primeiro de maio, a partir das 19:00 horas.

Chuzame! A Facebook A Twitter

Teresa Moure pregoeira da Feira do Libro de Santiago

Autores,Ensaio,Feiras_do_libro,Noticias

teresa_moureMañá, primeiro de maio, ás 13:00 na Alameda, Teresa Moure lerá o pregón que dá inicio á Feira do Libro de Santiago de Compostela. Teres asinará exemplares do seu ensaio máis recente, O natural é político, o martes 5 de maio, a partir das 19:00 horas.

Chuzame! A Facebook A Twitter

«Non son de aquí», presentación en Compostela

24 Abril 2009

Noticias,Poesía,Presentacións

xg00161401Hoxe, venres, 24 de abril, ás 20:00 horas, na Libraría Couceiro de Santiago presentarase Non son de aquí, o poemario de María do Cebreiro. No acto a autora estará acompañada por Manuel Darriba, Daniel Salgado e o editor Fran Alonso.

Chuzame! A Facebook A Twitter

«Do orixinal ao libro», presentación en Compostela

20 Abril 2009

Monografías,Noticias,Presentacións

xg00164101O 23 de abril, con motivo do Día Internacional do Libro e dos dereitos de autor, presentarase Do orixinal ao libro. Manuel de edición técnica do editor Juan Blanco Valdés. O acto, organizado polo Consello da Cultura Galega e por Xerais, realizarase ás 12:00 horas no Salón de Actos do Consello da Cultura Galega, Pazo de Raxoi, 2º andar, Praza do Obradoiro de Santiago. Intervirán  Jacobo Bermejo Barrera (Presidente do Cluster do Produto Gráfico e do Libro Galego), Manuel Bragado e o autor.

Chuzame! A Facebook A Twitter