Tras a pegada dun gran poeta do mar: «A narrativa mariña» de López Abente

31 Maio 2012

Biblioteca das Letras Galegas,Crónica

O xornal Sermos Galiza publica unha información sobre A narrativa mariña, de Gonzalo López Abente.

 

Tras a pegada dun gran poeta do mar

A redescuberta de Gonzalo López Abente sobe un chanzo coa publicación de A narrativa mariña. A Fundación de Muxía dedicada ao escritor marcouse o obxectivo reeditar a súa obra para lle dar o lugar de transcendencia que merece na literatura galega. O ano próximo, con gallo do cincuenta aniversario da súa morte, verá a luz a obra poética completa.

O vicepresidente da Fundación, X.H. Rivadulla Corcón non aforra entusiasmo á hora de destacar a obra do autor muxián. “Estamos diante dun dos grandes poetas do mar, á altura de Manuel Antonio, como teñen dito investigadores e críticos como Méndez Ferrín ou Miro Villar”, di. Bate así contra un esquecemento que, até hai ben pouco, botaba terra sobre a memoria dun autor cunha obra sen excesiva sorte editorial. “Unha das razóns para que López Abente non estea entre os grandes da nosa historia literaria é a má fortuna da súa obra, que deixou de estar en circulación nos últimos tempos” indica Rivadulla Corcón.

Para situar a figura do escritor, remítese a Risco ou Otero Pedrayo para quen Abente era un dos grandes poetas do seu tempo. Fundador das Irmandades da fala, autor dunha obra monolingüe en galego, académico que leu en 1941 o seu discurso na nosa lingua, primeiro presidente da primeira Asociación de Escritores Galegos e home de firmes conviccións nacionalistas semella que este ronsel de datos se esvaen na memoria literaria galega sen darlle aínda a López Abente o lugar merecido. Desde a Fundación López Abente están por dar a volta á moeda e traer á actualidade os títulos que obrigarán a unha relectura da súa obra e a súa transcendencia. “A publicación recente da obra inédita Bretemada (Alvarellos) foi, nese sentido, fundamental. Méndez Ferrín afirmou que se se editase no seu tempo, a historia da literatura galega leríase de xeito distinto” afirma Rivadulla Corcón. A publicación de Bretemada, en edición de Miro Villar, principal estudoso da súa obra, supuxo a descuberta dun libro de 1922 que até entón ficaba depositada nos arquivos da Real Academia Galega.

Cincuenta aniversario da morte

En 2013 farase o 50 aniversario da morte do escritor que viviu sempre en Muxía e, para esa data, a Fundación ten previsto publicar a  obra completa. Para iso  chegou a un acordo con Espiral Maior, selo que publicará os oito títulos poéticos na colección Ópera Omnia da man de Miro Villar, investigador que xa publicou unha antoloxía poética do autor en 1995. Na carteira teñen tamén a publicación da obra teatral María Rosa, representada no seu tempo polas Irmandades da Fala con Antón Vilar Ponte no elenco.

“O obxectivo principal é rehabilitar o autor pondo a súa obra en circulación” sinala Rivadulla Corcón. Alén diso, a liña de traballo da entidade que naceu en Muxía é converterse en foco de dinamización cultural na Costa da Morte. Con ese fin comezaron xa unha colaboración estábel coa Fundación Pondal, irmandando dúas fundacións que, por natureza, están chamadas a estabelecer unha relación na memoria da que mantiveron os seus dous escritores. “Eran curmáns e López Abente entra na Academia cun discurso sobre Pondal” comenta Rivadulla. Para o verán de 2013 prevén ter finalizado o roteiro que vai desde Ponteceso até Muxía, á aldea de Nemiña onde ía Pondal cada día a estudar.

C.V.

Chuzame! A Facebook A Twitter

A reivindicación de «A narrativa mariña», de Gonzalo López Abente, en Muxía

29 Maio 2012

Biblioteca das Letras Galegas,Presentacións

En Compás da Costa, Alberto Pose publica unha crónica da presentación en Muxía de A narrativa mariña, de Gonzalo López Abente, en edición de Suso Sambade e en colaboración coa Fundación López Abente.

Narrativa mariña e muxiá para a Biblioteca de Xerais

A colección da editorial Xerais “Biblioteca das Letras Galegas” xa conta cunha nova obra, neste caso trátase da Narrativa mariña do escritor muxián Gonzalo López Abente. En total xa son máis de 60 títulos dentro desta colección na que podemos atopar autores como Ramón Cabanillas, Celso Emilio Ferreiro, Rosalía de Castro…

Este volume de López Abente, editado por Xesús Sambade, pretende dar a coñecer os seus relatos curtos. En total trátase do reagrupamento de cinco novelas que pretende poñer novamente a disposición dos lectores e estudosos o conxunto narrativo máis destacado do escritor.

A benvida a esta nova obra déuselle na biblioteca municipal de Muxía o pasado sábado. O encargado de presentar o acto foi o vicepresidente da Fundación Gonzalo López Abente: X.H. Rivadulla Corcón, quen destacou  que “a obra e vida de López Abente estivo dedicada a defensa da nosa cultura e do noso idioma”. Así o demostra o feito de que toda a creación do autor está escrita na súa totalidade na lingua propia de Galicia.

Xesús Sambade foi o encargado da edición de “A Narrativa mariña”

No acto tamén estivo presente Manuel Bragado, director de Edicións Xerais de Galicia que salientou o carácter didáctico do libro e que agarda ademais, “que a nosa contribución permita por en valor a un dos creadores de narrativa galega do século XX.”

Pola súa parte, o director da Colección Biblioteca das Letras Galegas, Ramón Nicolás salientou o feito de que esta colección contribúe rotundamente a que se volva a ollar obras como a de López Abente, Lueiro Rei, Manuel Luís Acuña… autores que non chegaron a ser tan loados como Rosalía ou Pondal a pesares de que tiveron un papel destacado dentro do patrimonio literario e cultural galego.

Ramón Nicolás destacou tamén as dificultades que ata o de agora existían para acceder a obra de López Abente. Polo que eloxiou o papel do Padroado xa que «a labor de difusión da obra poética e narrativa de López Abente por parte da Fundación facilita e permite o acceso ao coñecemento, a lectura e a valoración do autor muxián.”

O último en intervir foi Xesús Sambade, responsable da edición de Narrativa mariña. Na súa intervención fixo unha descrición do libro de Abente resumindo brevemente cada un dos textos que forman o libro. En total son cinco relatos onde o mar vai xogar un rol fundamental. Así, forman parte deste libro O diputado por Beiramar (1918) coa que foi gañador do premio literario A Nosa Terra; O novo xuez (1922), Buserana (1925) e Fuxidos (1926), Completa o volume un apéndice coa novela O escandalo (1920), que difire do conxunto por non tratar a temática mariñeira.

Na presentación interviron Rivadulla Corcón, Ramón Nicolás, Manuel Bragado e Xesús Sambade

Con esta presentación, a Fundación López Abente consegue o seu obxectivo de difundir a creación do autor muxián, mais o seu traballo non remata coa publicación da Narrativa mariña, xa que teñen novos proxectos en mente. Deste xeito, Rivadulla Corcón afirmou que se presentará unha unidade didáctica para levarlles aos nenos a figura do escritor muxián, esta edición correría a cargo de Xan Fernández Carrera e previsiblemente estará listo para o inicio do curso escolar. Tamén destacou que se está traballando para crear o centro de interpretación da obra de López Abente “que vai ser un punto de referencia para os muxiáns, para toda a Costa da Morte e para todos os visitantes de Muxía.” Ademais diso, o Padroado pretende celebrar no 2013 o quincuaxésimo aniversario da morte do escritor coa edición da súa obra poética completa.

Alberto Pose

Chuzame! A Facebook A Twitter

Muxía, coa narrativa mariña de López Abente

28 Maio 2012

Biblioteca das Letras Galegas,Blogs,Presentacións

Tanto Manuel Bragado, director de Xerais, en Brétemas como Ramón Nicolás no seu blog, Caderno da crítica, realizan unha crónica da presentación en Muxía de A narrativa mariña, de Gonzalo López Abente, en edición de Suso Sambade e en colaboración coa Fundación López Abente.

En Muxía con López Abente

Viaxei a Muxía con Ramón Nicolás para participarmos na presentación d’ A narrativa mariña de Gonzalo López Abente que preparou Suso Sambade. O acto celebrouse nas instalacións da magnífica Biblioteca Municipal, un edificio cedido por Santiago Rey Fernández Latorre. É modélico o traballo dos membros da Fundación Gonzalo López Abente para poñer en valor e redimensionar a obra do primeiro escritor muxián, sempre fiel ao espírito das Irmandades da Fala. Rivadulla Corcón anunciou na súa intervención os proxectos da Fundación para celebrar en 2013 o 50 aniversario do pasamento do autor de Buserana, entre os que destacan a edición dunha unidade didáctica e a publicación da Poesía Completa por parte de Edicións Espiral Maior. Pola súa banda Sambade salientou a importancia da prosa de López Abente escrita para dignificar a lingua, as xentes e a paisaxe. Excelente serán literario.

Manuel Bragado

Onte en Muxía, da man de López Abente

Deixo aquí a ligazón a dúas completas crónicas  -a de Manuel Bragado e mais a de Miro Villar-  ás que eu teño ben pouco que engadir pois  que recollen acaidamente o que aconteceu no acto da presentación d´A narrativa mariñade Gonzalo López Abente,  desenvolta  onte nun magnífico espazo como é a Biblioteca Municipal de Muxía, lugar que acolleu a un bo número de persoas interesadas en saber máis de López Abente e desta publicación.

Desde aquí a miña gratitude a toda a xente de Muxía que asistiu ao acto e á garimosa atención que nos dispensaron aos viaxeiros desde a Fundación Gonzalo López Abente (a foto superior, de Viki Rivadulla, corresponde a un momento do acto). Beizóns, parabéns ao responsable da edición, Suso Sambade, e moita sorte cos proxectos!

Ramón Nicolás

Así mesmo, tamén o poeta Miro Villar publicou no seu blog unha anotación en que dá noticia do acto.

A narrativa mariña, de Gonzalo López Abente (edición literaria de Xesús Sambade). Crónica da presentación

(Cuberta do libro e imaxes da presentación, coa Biblioteca Municipal ateigada e coa mesa, onde fala Suso Sambade, a quen acompañan de esquerda a dereita, Manuel Bragado, Ramón Nicolás e Rivadulla Corcón. As fotografías son de Viki Rivadulla, secretaria da entidade. Premer nas imaxes para agrandar o tamaño)

Estivo abondo concorrido o importante acto literario organizado pola Fundación López Abente onte, día 26 de maio, na Biblioteca Municipal de Muxía. Sucedeu na presentación do volume A narrativa mariña, de Gonzalo López Abente, en edición literaria do profesor muxián Xesús Sambade e que se inclúe na prestixiosa colección Biblioteca das Letras Galegas de Edicións Xerais.

Desculpada a asistencia por motivos familiares de Félix Porto, alcalde de Muxía e presidente da Fundación López Abente, foi o vicepresidente X. H. Rivadulla Corcón quen pronunciou as palabras de benvida e saúda. Repasou máis unha vez os obxectivos da Fundación (da que fago parte), entre os que sobrancea o de reeditarmos a obra de Gonzalo López Abente e lembrou o compromiso do escritor muxián coa nosa lingua (velaí o seu monolingüismo na práctica totalidade da súa obra, agás  o uso do castelán nalgúns, moi poucos, textos de menor entidade), coa paisaxe atlántica da Costa da Morte e coa muxiá en particular e tamén coa xente que habita este territorio. Tamén adiantou os próximos proxectos editoriais: unha guía didáctica para uso escolar, que está a ultimar Xan Fernández Carrera, e a obra poética completa na que eu ando enguedellado para bastante tempo.

Deseguida, Manuel Bragado, director de Edicións Xerais, sinalou como desde o seu proxecto editorial están a revalorizar a moitas autoras e autores que hoxe podemos considerar clásicos (nun excelente labor de recuperación, e este subliñado é noso) que é unha das varias liñas editoriais que conforman o catálogo deste selo xa histórico na literatura galega moderna. Ao tempo incardinou o labor editorial dentro dunha angueira que ten como norte a defensa da nosa lingua e da nosa cultura, coa mesma forza identitaria dos proxectos creados na época das Irmandades da Fala e logo de Nós, etapas nas que Gonzalo López Abente tivo moito protagonismo, malia vivir sempre en Muxía. Na bitácora brétemas, notas do traballo de edición do propio Manuel Bragado, xa se podía ler onte a súa crónica persoal.

Por parte, o profesor e crítico literario Ramón Nicolás, director da Biblioteca das Letras Galegas, lembrou a importancia desta colección, da que A narrativa mariña, de Gonzalo López Abente, fai o número 67, pois nela está publicada a obra case completa de autores fundamentais coma Rosalía de Castro, Eduardo Pondal, Curros Enríquez, Ramón Cabanillas ou Celso Emilio Ferreiro, entre outros, e ao tempo serve para recuperar a obra doutros menos coñecidos ou divulgados coma o poeta Manuel Luís Acuña ou o narrador Manuel Lueiro Rey. Eu propio podo dar testemuño deste último obxectivo porque nesa mesma colección xa preparei as edicións literarias de Orballo da media noite, de Roberto Blanco Torres (1998); Indo para máis perto. A señardade no puño, de Xosé Alexandre Cribeiro (2004) e Poesía galega completa e textos en prosa, de Emilio Álvarez Blázquez (2005).

Xa logo, Ramón Nicolás dixo falar como crítico literario (colaborador de varias publicacións especializadas, de xornais e cunha moi interesante bitácora denominada cadernodacrítica) para situar a narrativa breve de Gonzalo López Abente no contexto da literatura galega de preguerra e lembrar a anécdota persoal de que en 1995, nun traballo sobre o tempo das Irmandades da Fala, elaborado para Hércules Ediciones, non lle sería doado atopar os títulos abentianos (non o é para ninguén) se non existisen os fondos históricos da viguesa Biblioteca da Fundación Penzol, que garda moitas xoias da nosa literatura, e que nese mesmo ano tamén se achegou á súa poesía
através da Antoloxía poética que preparei e que editou Espiral Maior.

O profesor muxián Xesús Sambade, editor literario e autor da excelente Introdución que acompaña A narrativa mariña, de Gonzalo López Abente, explicou na fala dialectal muxiá as razóns de reeditar estas cinco inencontrables novelas curtas do autor muxián: O diputado por Veiramar (1918); O escándalo (1920); O novo xuez (1922); Buserana (1925) e Fuxidos (1926), xustificando a escolla do título para o conxunto (que recolle unha proposta miña) pola ligazón que todas as obras teñen co ambiente mariñeiro, non só na descrición da paisaxe senón tamén no deseño dos seus personaxes protagónicos. Fixo un breve percorrido polo nó argumental de cada un dos textos e rematou convidando á súa lectura, nomeadamente pola xente de Muxía e mesmo de toda a Costa da Morte, xa que os ambientes e os personaxes teñen moito a ver coa nosa idiosincrasia.

Miro Villar

Chuzame! A Facebook A Twitter

A presentación de «A narrativa mariña», de Gonzálo López Abente, no blog de Miro Villar

25 Maio 2012

Biblioteca das Letras Galegas,Blogs,Noticias,Presentacións

O escritor Miro Villar publica no seu blog unha anotación sobre a presentación, mañá sábado, de A narrativa mariña, de Gonzalo López Abente, en edición de Suso Sambade e en colaboración coa Fundación López Abente.

 

A narrativa mariña, de Gonzalo López Abente (edición literaria de Xesús Sambade) preséntase o vindeiro sábado en Muxía

O mes das Letras Galegas remata en Muxía coa celebración dun importante acto literario organizado pola Fundación López Abente. Este sábado, día 26, ás 19,30 na Biblioteca Municipal da localidade costeira vai ter lugar a presentación do volume A narrativa mariña, de Gonzalo López Abente, en edición literaria do profesor muxián Xesús Sambade e que se inclúe na prestixiosa colección Biblioteca das Letras Galegas de Edicións Xerais.

As palabras de benvida e saúda de Félix Porto, alcalde de Muxía e presidente da Fundación López Abente, darán paso á intervención de Manuel Bragado, director de Edicións Xerais (quen non hai moito xa visitou Muxía para presentar a novela O noso amor será eterno, de X. H. Rivadulla Corcón, baseada na lenda da Buserana); do profesor e crítico literario Ramón Nicolás, director da colección Biblioteca das Letras Galegas, e finalmente do profesor Xesús Sambade, editor literario e autor da excelente Introdución que acompaña á prosa abentiana e que xa puiden ler nas primeiras probas de maquetación do libro.

A narrativa mariña, de Gonzalo López Abente, reedita cinco inencontrables novelas curtas do autor muxián: O diputado por Veiramar (1918); O escándalo (1920); O novo xuez (1922); Buserana (1925) e Fuxidos (1926). A escolla do título para o conxunto obedece á ligazón que todas as obras teñen co ambiente mariñeiro, non só na descrición da paisaxe senón tamén no deseño dos seus personaxes protagónicos.

Tiven a gozosa oportunidade de reler todos estes textos na edición que preparou o amigo Suso Sambade, quen nos ha dar moitas sorpresas na explicación do seu traballo. A min xa me serviu para lembrar a potencia narradora dun autor que é moito máis coñecido polo seu estro.

Chuzame! A Facebook A Twitter

Xerais publica cinco novelas curtas de Gonzalo López Abente de temática mariña

24 Maio 2012

Biblioteca das Letras Galegas,Noticias

A edición de La Voz de Galicia de Carballo publica a noticia da aparición de A narrativa mariña, de Gonzalo López Abente, en edición de Suso Sambade e en colaboración coa Fundación López Abente.

 

La Fundación López Abente recupera la obra narrativa del autor muxián

La recopilación, titulada «A narrativa mariña», incluye las cinco novelas cortas del escritor

Las cinco novelas cortas del escritor Gonzalo López Abente (1878-1963) han sido recuperadas en una obra titulada A narrativa mariña gracias a la fundación que vela por el legado literario del autor muxián. O diputado por Beiramar (1918), O novo xuez (1922), Buserana (1925), Fuxidos (1926) y O Escándalo (1920) son los trabajos recogidos en este nuevo volumen, el segundo publicado por la entidad tras el poemario Bretemada.

Suso Sambade, patrono de la fundación, es el editor del libro, que publica Xerais y que será presentado el próximo sábado en la biblioteca Santiago Rey Fernández-Latorre de Muxía.

Chuzame! A Facebook A Twitter

Novidade: «A narrativa mariña», de Gonzalo López Abente

Biblioteca das Letras Galegas

Xerais acaba de publicar na colección BLG A narrativa mariña, de Gonzalo López Abente, en edición de Suso Sambade, en colaboración coa fundación muxiá  que garda a memoria do autor.

A publicación destas novelas curtas, ou relatos, quere dar a coñecer parte da obra literaria do escritor muxián. En 1918 os escritores das Irmandades da Fala, interesados en crearen a narrativa galega moderna, convocaron un premio literario en A Nosa Terra, do que saíu gañadora a obra O diputado por Beiramar de Gonzalo López Abente. Iniciou así unha fecunda carreira narrativa coa publicación de O novo xuez (1922), Buserana (1925) e Fuxidos (1926), obra que representa a madurez expresiva do autor. Ambientadas na costa, o mar xogará un papel fundamental na acción dalgunha delas.

Chuzame! A Facebook A Twitter