Pedro Feijoo estará mañá no Club de lectura Sete Vidas, de Espazo Lectura, en Gondomar, para falar de «Os fillos do mar»

4 Xuño 2012

Animación á lectura,Clubs_de_lectura,Narrativa,Noticias

O escritor Pedro Feijoo participará mañá martes no Club de Lectura Sete Vidas, que promove a asociación Espazo Lectura en Gondomar, para falar da súa novela Os fillos do mar, finalista do Premio Xerais 2011.

 

A novela «Os fillos do mar» no club Sete vidas

Este martes 5 de xuño o club de lectura Sete vidas pecha a tempada cunha sesión na que falaremos da novela Os fillos do mar, de Pedro Feijoo, editada por Xerais. A actividade comeza coma sempre ás 20:00h na Biblioteca Municipal de Gondomar. A partir das 21:00h Pedro Feijoo achegarase á biblioteca para conversar sobre a novela coas persoas que participen na sesión. Con esta proposta o club Sete vidas de Espazo Lectura despídese ata o mes de outubro.

O libro

A novela Os fillos do mar, finalista do Premio Xerais 2011, condúcenos polo Vigo de hoxe da man de Simón, un arquitecto mediocre que recibe un estraño encargo para realizar unha reforma nun pazo de Canido, propiedade de Isabel Llobet, unha muller da alta sociedade viguesa. A novela, de intriga e aventuras, proponnos tamén unha viaxe histórica ata a Batalla de Rande, a Guerra Civil española e os tempos do nazismo alemán. Unha novela trepidante que nos achega aos tesouros da cidade de Vigo, da súa arquitectura e da súa historia

O autor
Pedro Feijoo (Vigo, 1975) posúe unha formación filolóxica, pero exerceu profesionalmente como músico no grupo «Lamatumbá» durante algúns anos. Publicou un ensaio titulado Cousas do ‘Galicia’, por Castelao (1997) e Viva ou Fu Remol! (2005). Na actualidade traballa nun estudio musical e compaxina este labor coa creación literaria. Os fillos do mar é a súa primeira novela.
Chuzame! A Facebook A Twitter

Antón Cortizas estará no Lendo Contigo, en Gondomar, mañá sábado con «Vaia tropa!»

23 Marzo 2012

Clubs_de_lectura,Infantil,Merlín,Poesía

O libro Vaia tropa! de Antón Cortizas, centrará este sábado 24 o Club Lendo Contigo, de Espazo Lectura, e contará coa presenza do autor na Biblioteca de Gondomar.

Antón Cortizas, no Lendo Contigo deste sábado

O sábado 24 de marzo, a partir das 12:00 horas, terá lugar na Biblioteca de Gondomar a sesión mensual do Lendo Contigo, dedicado a nenos e nenas de 8 a 12 anos, e seus pais e nais.
Nesta ocasión, o libro do que se vai falar é Vaia tropa!(Xerais, 2011), do escritor ferrolán Antón Cortizas.

Contaremos coa presenza do autor
Antón Cortizas estará con nós na Biblioteca de Gondomar para charlar cos nenos e nenas que participen na actividade.
O libro
Vaia tropa! é un libro de poesía do absurdo, do sen sentido, e está pensado para ser lido de formas diversas. Hai poemas que terás que ler de esguello e noutros precisas usar un espello e así poder ler do verso o reflexo. Como non era cousa de poñer só letras alguén debuxou algunhas caretas. E como os debuxos están contrafeitos usarás o espello para velos con xeito. Ao final do libro convidámoste a que inventes algún compañeiro para toda esta xente. Trátase, xa que logo, dun libro xogo, no que a sorpresa da lectura e das ilustracións conforman un conxunto que non pasará desapercibido ao lector.

O autor
Antón Cortizas Amado (Ferrol, 1954) é profesor. En 1986 gañou o premio Curuxa de Humor co relato A medio muller. Desde esa data, a súa dedicación á literatura infantil e xuvenil tenlle deparado moitos recoñecementos, como o premio Barco de Vapor por Memorias dun río (1988) e O conto dos sete medos (1991) e, tamén en dúas ocasións, o premio Xeración Nós de textos teatrais por O coleccionista de sombras (1990) e O incrible invento de Solfis a pianista (1994). Outros títulos publicados por Cortizas son Xiganano, ¿onde estás? (1990), O lapis de Rosalía (1992), A bruxa sen curuxa (1993), O merlo de ferro (1995), A merla de trapo (Premio Merlín 2001) ou ¡Cázame ese pensamento! (2001).

Chuzame! A Facebook A Twitter

Luís Rei Núñez visita o club de lectores “A pregunta do cuco”

22 Marzo 2012

Clubs_de_lectura,Narrativa

Mañá venres, 23 de marzo, a partir das 18:00 horas, o escritor Luís Rei Núñez, visitará o club de lectores “A pregunta do cuco“. Este club de lectores, que se reúne mensualmente na Libraría Michelena de Pontevedra, escolleu nesta ocasión a lectura de Cita en Fisterra.

Chuzame! A Facebook A Twitter

Anxo Angueira: «Hai que escribir moito coa cabeza antes de facer unha novela». A súa nova novela, «Iria» sairá o vindeiro mes de abril

20 Marzo 2012

Clubs_de_lectura,Narrativa,Noticias

O Diario de Arousa recolle a información da visita de Anxo Angueira ao Club de Lectura do IES de Valga, ao que acudiu para falar de Pensa nao, Premio Xerais de Novela 1999. No próximo mes de abril, Xerais publicará Iria, a nova novela de Anxo Angueira.

 

EL ESCRITOR DE DODRO VISITÓ EL CLUB DE LECTURA DEL lES DE VALGA

Anxo Angueira: “Hai que escribir moito coa cabeza antes de facer unha novela”

Escribir unha novela non é sentarse e xa está. Previamente hai que documentarse e escribir na cabeza moito tempo”. Así explicó el escritor Anxo Angueira el proceso literario durante la viska que realizó el jueves al Club de Lectura del instituto de Valga. Alumnos, padres y profesores participaron en la biblioteca del centro en el encuentro con Angueira para analizar su obra “Pensa Nao”, por la que recibió el Premio Xerais en el año 1999, el principal premio de novela en Galicia.

Anxo Angueira, natural del municipio coruñés Dodro, afirmó que en su novela pretendía hablar “con amor e con orgullo da miña aldea, Manselle”, incluyendo en el libro “cousas persoais e intimas, como fai todo escritor que escribe con paixón”. Este profesor de Lengua y Literatura en el IES Meixoeiro de Vigo y docente en la Facultad de Traducción de la Universidad viguesa, apuntó que la inspiración para crear “Pensa Nao” la encontró en unas cartas de su tío y de su abuela que un día le entregó su madre. “Ao ler ese tesouro que é a memoria da miña familia –explicó– díxenme a min mesmo: Ponte a escribir[“. De ahí surgió “Pensa Nao”, una recreación ficcionada de los sucesos acaecidos en Sernanselle –aldea de Dodro– desde el San Martirio de 1935 hasta iulio de 1936.

El Club de Lectura del IES Valga, coordinado por el profesor Miguel Fernández, lleva ya varios años reuniéndose mensualmente en la biblioteca del centro educativo y cuenta con la participación de padres, estudiantes y personal docente. A lo largo de sus años de existencia, y con anterioridad a Anxo Angueira, ya había recibido la visita de varios escritores para analizar alguna de sus obras.

Chuzame! A Facebook A Twitter

Xavier Queipo estará hoxe no Club de Lectura Sete Vidas, en Gondomar, con «Extramunde»

13 Marzo 2012

Animación á lectura,Clubs_de_lectura,Narrativa

O escritor Xavier Queipo  participará hoxe no Club de Lectura Sete Vidas, dedicado á narrativa, que promove a asociación Espazo Lectura en Gondomar, para falar da súa novela Extramunde, Premio Xerais 2011.

O premio Xerais de novela, Xavier Queipo, no Sete Vidas deste mes

Este martes, 13 de marzo, a partir das 20.00 horas na Biblioteca de Gondomar, terá lugar a sesión mensual do club de lectura Sete Vidas.

O escritor Xavier Queipo, Premio Xerais de Novela 2011 e recente Premio Ánxel Casal ao Autor do Ano, participará este martes, 13 de novembro, no club de lectura Sete Vidas para falar cos lectores e lectoras da súa última novela Extramunde (Xerais, 2011).

Na primeira parte da sesión, de 20.00 a 21.00 horas, as persoas que participen no club poderán conversar arredor da novela antes de que o propio autor, Xavier Queipo, se incorpore á tertulia para charlar cos lectores e lectoras.

O libro
Extramunde narra, co alento prendido nas entrañas, unha viaxe alucinada que vai da freguesía de San Andrés deica a illa de Borneo, pasando por Senegal, Camerún, o Cabo de Boa Esperanza, Mozambique, a illa de Madagascar, a badía de Trincomalee, as illas de Anamán e o estreito de Malaca. Unha novela que retrata o poder omnímodo da Igrexa nos tempos escuros da Inquisición e a navegación polos océanos Atlántico e Índico na procura de mundos afastados, para rematar nun poboado da tribo dos Dayaks, os cortadores de cabezas. Extramunde, escrita nunha prosa coidada, engaiolante, por veces vertixinosa, supón a culminación dun soño: a negación da diferenza, a procura da liberdade. Dividida en catro seccións, cada unha cun ritmo e cun alento diferenciado, admite varios niveis de lectura, pois é, ao mesmo tempo, novela de aventuras, de viaxes e de pausada reflexión. Unha novela que non vai deixar indiferente a quen se adentre no proceloso mar da escrita de Queipo.
O autor
Xavier Queipo (Compostela, 1957). Licenciado en Bioloxía e Medicina e Cirurxía, desde 1989 vive e traballa en Bruxelas como funcionario da Unión Europea. É un dos autores que durante a década de 1990 incorporou á narrativa galega rexistros e temas nos que salientan a heterodoxia e o gusto pola hibridación cultural. Desde 1990 escribe e publica regularmente en galego. É autor, entre outros libros, de Ártico e outros mares (relatos, 1990); Ringside (relatos, 1993), O Paso do Noroeste (novela, 1996); Malaria sentimental (novela, 1999); Papaventos (2001, novela); O ladrón de esperma (2001, relatos); Os ciclos do bambú (2003); Glosarios (poesía, 2004); O espello e o dragón (2005, literatura infantil); Dragona (2007, novela); Caderno da Revolución Cultural (crónicas radiofónicas, 2007); Saladina (novela, 2007); Felices e diferentes (crónicas radiofónicas, 2009); A illa dos cangrexos violinistas (literatura infantil, 2009); Cartas marcadas (ensaio, 2010); Ártico 2.0 (relatos, 2011) e Extramunde, Premio Xerais de Novela 2011.

Membro do Dichterscollectif van Brussel desde 2007. Recibiu varios premios en Galicia e o Premio da Crítica española en 1991. Ten participado en numerosos libros coletivos e antoloxías, traduciu do francés ao galego a Amin Maalouf e Hervé Guivert, e do inglés a Conrad e Joyce.

Chuzame! A Facebook A Twitter

Os «hoax» como fío condutor e deconstrución: anotación sobre «Ninguén», de Fran Alonso, en Trafegando ronseis

25 Xaneiro 2012

Clubs_de_lectura,Críticas,Narrativa

Trafegando Ronseis publica unha anotación de Gracia Santorum sobre Ninguén, de Fran Alonso.

 

Ninguén

Xa a nosa colaboradora Rosa recomendara este libro, pero non quero deixar pasar a ocasión de facelo eu tamén. Tiven a oportunidade de ler Ninguén de Fran Alonso, publicado pola editorial Xerais, co club de lectura virtual Falemos de lecturas este mes que me correspondía a coordinación. En contra do esperado, pola carga que me supuña este traballo, gocei dobremente: non só porque a súa lectura é atraente e máis que recomendable, senón tamén porque a xenerosidade do seu autor fixo posible un diálogo constante entre lectores e escritor que enriqueceu a visión do lido e as opinións dun xeito incrible. Non hai máis que comprobar o número de comentarios orixinados. A pena que me queda é que non participase máis xente.
Unha das cuestións que abordabamos ao inicio da lectura de Ninguén foron os “hoax” que intercalan as historias, unha especie de ponte entre elas. Fran deixóunolo claro: constitúen, sobre todo e principalmente, o fío condutor do libro, coma se fosen a liña continua dunha estrada que vai marcando un camiño. Un fío condutor e deconstrución da narración.
Ninguén convértese nun libro novidoso, moi acorde coa nosa sociedade actual, fragmentaria, urbana, ás veces antisocial, ás veces suplicadora de relacións, ás veces chea de ruídos que sobran. Todos e todas estamos alí, en pequenos fragmentos, identificándonos nalgúns aspectos, créndonos lonxe doutros, loitando por non estar naqueloutros que máis nos disgustan. Pero tamén reinterpreta o destino da sociedade que estamos a crear, a nosa evolución.
Un libro que nos fai reflexionar e mirarnos con outros ollos, sentindo que moitos dos movementos que damos están nos personaxes que crea Fran Alonso. E os espellos adoitan ser duros.

Chuzame! A Facebook A Twitter

“Despois da medianoite” de Salma, no Club de Lectura do Centro de Documentación Feminista

20 Xaneiro 2012

Clubs_de_lectura

O mércores, 25 de xaneiro, o Club de Documentación Feminista do Concello de Vigo e Implicadas no Desenvolvemento, organizan o club de lectura sobre o libro Despois da medianoite da escritora tamil Salma e traducido ao galego pola escritora e tradutora María Reimóndez.

O encontro terá lugar na Biblioteca Central, rúa Joaquín Yáñez, 6 de Vigo.

Chuzame! A Facebook A Twitter

Falemos de lectura propón unha lectura fragmentada de «Ninguén», de Fran Alonso

3 Xaneiro 2012

Clubs_de_lectura,Narrativa,Noticias

O blog Falemos de lectura propón Ninguén, de Fran Alonso, para o club de lectura virtual a través dunha lectura fragmentada que comeza coas primeiras 60 páxinas.

Empezando con «Ninguén»

Para que todas e todos teñades tempo para ler o libro sen apuros, deleitándose na lectura e sen agobios, propoñémosvos un novo xeito de achegarnos a este espazo virtual común de compartirmos lecturas: imos dividir o libro de xeito que cada semana chegaremos ata un número determinado de páxinas. Se alguén quere ler máis, por suposto, pode facelo, baixo a condición de non comentalo para non estragar a lectura dos outros. A proposta é moi accesible e estamos seguros de que ninguén vai asegurar que non tivo tempo para ler. Que vos parece?

Emprazámosvos para este sábado día 7 de xaneiro: este día comezaremos a falar das primeiras 60 páxinas do libro, ata o capítulo chamado “Comunidade literaria”. Por suposto, insistimos, se alguén quere seguir coa lectura que o faga, pero os comentarios cinguiranse a estas páxinas.

De todos os xeitos, estamos abertos ás vosas suxestións. Se credes que este xeito de levar o club de lectura non é o apropiado podemos cambialo inmediatamente. Vós sodes @s que mandades.

Se alguén precisa “facer boca” deixámosvos unhas cantas ligazóns de críticas sobre o libro:

En Novenoites.

En Criticalia.

En Galicia confidencial.

En Caderno da crítica.

En Trafegando ronseis.

Por suposto, no blogue da editorial Xerais hai asemade diferentes entrevistas e outras opinións verquidas arredor do noso libro de lectura. Alí podedes atopar toda a información.

Chuzame! A Facebook A Twitter

«Ti non xogas», de Silvestre Gómez Xurxo, no Club Lendo Contigo de Espazo Lectura

24 Novembro 2011

Animación á lectura,Clubs_de_lectura,Infantil,Merlín

O libro Ti non xogas!, de Silvestre Gómez Xurxo, centrará este sábado 26 o Club Lendo Contigo, de Espazo Lectura, e contará coa presenza do autor na Biblioteca de Gondomar.

O Lendo Contigo recibe a Silvestre Gómez Xurxo para falar de «Ti non xogas»

O sábado 26 de novembro, a partir das 12.00 horas, terá lugar na Biblioteca de Gondomar a sesión mensual do Club de Lectura Compartida Lendo Contigo, dedicado a nenos e nenas de 8 a 12 anos, e seus pais e nais.

Nesta ocasión, o libro do que se vai falar é Ti non xogas!, do escritor Silvestre Gómez Xurxo (Xerais, 2011). Se aínda non tes a guía de lectura para esta sesión, podes consultala picando aquí.

Contaremos coa presenza do autor

Silvestre Gómez Xurxo estará con nós na Biblioteca de Gondomar para charlar cos nenos e nenas que participen na actividade.

O libro

Durante unha semana enteira non parou de chover e hoxe por fin saíu un sol radiante. Pero Suso, en vez de estar a xogar ao fútbol co resto dos rapaces, está sentado nun chanzo da escaleira do patio da escola. Está aburrido e amolado. O peor é estar amolado, e estao, porque cando quería xogar Róber chimpoulle: —Ti non xogas! Non houbo ninguén que lle dixese a Róber que iso non se podía facer, que todos poden xogar e ninguén ten dereito sobre os demais. Por iso Suso está amolado, porque non soubo que facer.

O autor

Silvestre Gómez Xurxo (Beba, Mazaricos 1951) é mestre, licenciado en Xeografía e Historia e Psicopedagoxía. Director da Escola de Formación Social de Vigo. Autor de numerosos materiais educativos destinados ao ensino da lingua galega, do coñecemento do medio e de matemáticas na Educación Primaria. Coautor, xunto con Ana María Llanes, do método de aprendizaxe da lectura en lingua galega De Vagar (2003). O seu primeiro libro foi Conversas do Pai Seixas (1985). Ten publicadas as seguintes obras de literatura infantil e xuvenil: Déixao medrar (2000), novela; Ith (2001), novela Todo vai ir ben (2005) e Ti non xogas! (2011).

Chuzame! A Facebook A Twitter

«Non hai noite tan longa», de Agustín Fernández Paz, centrará mañá o Club Sete Vidas de Espazo Lectura

7 Novembro 2011

Animación á lectura,Clubs_de_lectura,Narrativa

A novela  Non hai noite tan longa, de Agustín Fernández Paz, centrará mañá o Club Sete Vidas de Espazo Lectura, que se celebrará ás 20 horas na Biblioteca de Gondomar e que contará coa presenza do autor. Tal e como se pode ler na web da asociación, «as persoas que participen no club poderán conversar arredor da novela antes de que o propio autor, Agustín Fernández Paz, se incorpore á tertulia para charlar cos lectores e lectoras».

Chuzame! A Facebook A Twitter

«Peaxes», de Santiago Lopo, pechou onte a tempada do club de lectura Sete Vidas, de Espazo Lectura

8 Xuño 2011

Clubs_de_lectura,Narrativa

A novela Peaxes, de Santiago Lopo, pechou onte a última sesión desta tempada do club de lectura Sete Vidas, de Espazo Lectura, en Gondomar. O acto, que contou coa presenza do autor, desenvolveuse a partir das 20,00 horas na Biblioteca Municipal de Gondomar.

Peaxes da conta ollada sobre os demais que lanza o cobrador da peaxe dunha autoestrada. Desde a súa ventá ao mundo, un caixeiro de peaxe da autoestrada bota unha ollada ás fraccións de vidas que se cruzan con el acotío. Esas instantáneas compoñen unha colaxe que lle axuda a fuxir da soidade. A partir destes encontros fugaces, ceiba a súa imaxinación e crea un universo ao ritmo da música que sae dos nosos vehículos cando baixamos a xanela para pagar, un planeta movido por anacos de conversas que desaparecen a cen quilómetros por hora. Desde a cabina, o narrador obsérvanos, temeroso de mergullarse na nosa rutina, mais contento de que rompamos a súa. Os usuarios da autoestrada erixímonos en protagonistas dun relato áxil que acelera nas curvas perigosas. En Peaxes conflúen todas as Galicias existentes e as imaxinadas, demostrando que realidade e ficción comparten a miúdo o noso destino. Unha novela breve que fará gozar a lectores e lectoras.

Chuzame! A Facebook A Twitter

Cid Cabido estará hoxe en Gondomar con «Unha historia que non vou contar» da man de Espazo Lectura

11 Xaneiro 2011

Animación á lectura,Clubs_de_lectura,Narrativa

O escritor Cid Cabido estará esta tarde en Gondomar, participando nunha sesión do Club de lectura Sete Vidas, organizado por Espazo Lectura, que se celebra arredor do seu libro Unha historia que non vou contar.

A sesión terá lugar ás 20,00 horas, na Biblioteca de Gondomar e o encontro co autor ás 21 horas no mesmo lugar. A partir dese momento, será o propio autor quen comparta as impresións dos lectores e lectoras sobre o libro.

Chuzame! A Facebook A Twitter

«A profesora Ripaldi», de María Alcañiz, centrará o Club de lectura compartida Lendo Contigo

17 Decembro 2010

Animación á lectura,Clubs_de_lectura,Infantil,Merlín

A profesora Ripaldi, de María Alcañiz, centrará mañá sábado o Club de lectura compartida Lendo Contigo, que organizado cada mes por Espazo Lectura en Gondomar. Os responsables do evento anuncian a presenza, por primeira vez, da protagonista do libro, a profesora Ripaldi.

A sesión do Lendo Contigo terá lugar ás 12 horas da mañá do sábado na Biblioteca Pública e está destinada a nenos e nenas de 8 a 12 anos, así como aos seus pais e nais.

Chuzame! A Facebook A Twitter

Manuel Portas estará hoxe con «Denso recendo a salgado» no Club Sete Vidas de Espazo Lectura, en Gondomar

2 Novembro 2010

Autores,Clubs_de_lectura,Narrativa

O escritor Manuel Portas estará presente esta tarde ás 20.00 horas na Biblioteca Municipal de Gondomar para falar e participar cos asistentes ao Club de Lectura Sete Vidas, que organiza Espazo Lectura, nun debate en torno a súa novela Denso recendo a salgado.

Chuzame! A Facebook A Twitter

«O lapis do carpinteiro» no club de lectura Sete Vidas de Gondomar

28 Xullo 2010

Clubs_de_lectura,Narrativa,Noticias,Presentacións

O venres 23 de xullo, na Casa da Lectura, Espazo Lectura celebrou unha sesión especial do club de lectura Sete Vidas onde máis de 15 persoas compartimos as nosas impresións sobre a novela de Manuel Rivas O lapis do carpinteiro a partir das preguntas que nos realizou Todd Mack, un investigador da Universidade de Stanford que nos visitou para asistir a un club de lectura e poder recabar información sobre a recepción da novela de Rivas nos lectores galegos.

Todd Mack é un estudante de doutoramento na Stanford University que está a traballar nunha tese sobre a influencia que tiveron catro novelas nas prácticas narrativas ou de memoria histórica nas comunidades que describen. As novelas son O lapis do carpinteiro (de Manuel Rivas), O fillo do acordeonista (de Bernardo Atxaga), Les veus del Pamano (de Jaume Cabré) e Beatus Ille (de Antonio Muñoz Molina).

Chuzame! A Facebook A Twitter

Emilio Alonso Pimentel na Lonxa Literaria de Moaña

16 Xuño 2010

Clubs_de_lectura,Narrativa,Noticias,Premios,Tertulia

O próximo venres, 18 de xuño de 2010, a  partir das 9 da noite, terá lugar no centro sociocultural Daniel Castelao, de Quintela unha tertulia dos membros da Lonxa Literaria de Moaña con Emilio Alonso Pimentel arredor da novela Mercurio, obra gañadora do VIII Premio  de novela por entregas La Voz de Galicia 2008.

Chuzame! A Facebook A Twitter

«Proxecto pomba dourada» de Miguel Vázquez Freire

30 Maio 2010

Clubs_de_lectura,Fóra de Xogo,Opinións_lectores/as,Xerais nos blogs

Proxecto pomba dourada de Miguel Vázquez Freire

Arno, ao chegar da escola, atópase a seus pais asasinados. Os pais de Arno eran uns famosos científicos que tiñan un proxecto para mellorar o futuro de Ferrocoruña: o Proxecto Pomba Dourada. Para tentar averiguar algo, métese no ordenador de seus pais e estes danlle pistas para que só el poda acertar o contrasinal, que é MERLÍN. Tamén sae un vídeo deles no que lle dan unhas claras instrucións e a localización dun Anel tecnolóxico que lle dará consellos e que só está na súa mente, que tamén se chama Merlín.

Logo, ten que ir a Fisterra, tal e como dixeron seus pais. No camiño coñece a Tullido, Gwendaill e ao xigante Imaz, que son Borrallas. Nesta viaxe, toparase cunha longa serie de aventuras que poñerá en perigo a súa vida, a dos demais e a de Pomba Dourada. A historia remata cando Arno logra chegar a Fisterra e entrega o proxecto Pomba Dourada no laboratorio do Mestre Cego, para así conseguir mellorar o futuro informático de Ferrocoruña e, probablemente, do mundo. Marcos Vidal (2º D)

Anotación publicada no blog «Linguason» do Clube de Lingua do IES de Porto do Son.

Chuzame! A Facebook A Twitter

«Unha estrela no vento» de Ledicia Costas

Clubs_de_lectura,Fóra de Xogo,Opinións_lectores/as,Xerais nos blogs

[Unha estrela no vento] A novela de Ledicia Costas segue a ser unha das lecturas preferidas polos rapaces e rapazas dos primeiros cursos da ESO e tamén polos membros do Clube da Lectura.

Está é unha historia que conta a vida dun rapaz de dezasete anos que se chama Miguel Foz. O protagonista na casa cos seus pais e súa irmá pequena Paula e aínda vai ao instituto. Alí, pensa que a súa profesora de literatura lle ten manía, ata que esta un día despois de moitos días preguntándolle polos deberes, que nunca os tiña, respondeulle cunha contestación que deixou a todos parvos. Isto fíxoo acompañado dun precioso poema que inventara nese mesmo intre.

Un día cando foi á Lagoa, o bar ao que adoitaban ir el mais os seus amigos, atopouse cunha moza que vendía rosas. Era xitana e chamábase Reina. Fixéronse moi amigos e quedaron de verse todos os días que puideran nese lugar. Así o fixeron. Uns días despois, ao saír do bar, atopouse co Bruto e os seus amigos. Comezaron a meterse con el e acabaron dándolle unha malleira que o deixou no hospital. Durante uns días non podería moverse moito polas feridas, producidas pola malleira, que tiña no abdome.

Por outra banda, o seu pai foise de viaxe de negocios, segundo o que contara na casa, pero non era verdade. Ó que ía era de vacacións coa súa amante. Miguel descubriuno e cando a súa nai se decatou da verdade botou o homeda casa. Ela tivera que ir ao enterro da súa irmá e mais do seu cuñado, que morreran nun accidente. Tiñan un fillo en común que se chamaba Abel, que a nai de Miguel decide levar a vivir con eles.

En canto a Miguel, nos seguintes días de clases todo o mundo o miraba con cara rara pola malleira recibida. pero todos se puxeran de acordo para devoverlle a malleira ao Bruto e aos seus amigos. Estando todos na Lagoa dúas tardes antes da pelexa, entrou Reina e contoulle a Miguel que ela era a irmá do Bruto. El quedou algo asustado pero non ía desconfiar dela. En cambio, o Maqui, que era un dos amigos de Miguel, non confiaba nela. Miguel e o Maqui pelexaron por culpa de Reina ata que este se foi para o bando do Bruto. Esa noite,cando Miguel e Reina estaban paseando , atopáronse cun amigo do Bruto que lles avisou de que ía ir xunto a el e lle contaría todo, pois ela non podía estar a esas horas da noite fóra da casa sen permiso do seu irmán. Cando chegou este á Lagoa, despois de ser avisado que a súa irmá estaba fóra da casa sen o seu permiso, Miguel empezou a pegarlle. As cousas acabaron mal e cando marcharon os outros, Miguel díxolle a Reina que non podía ir para a súa casa, que el a acollería na del mentres os problemas non se arranxasen. Ela aceptou.

Por fin, chegou o día da pelexa. Cando todos estaban alí, puxeron unhas normas: non se podía tocar nin a Miguel nin a Abel. O Maqui algo tramaba, pois non paraba de rir. Cando todos estaban pelexando, este acercouse a onde estaban eles e Miguel, ao estar aínda mal pola ferida, e Abel, que era minusválido, non se puideron defender. A Miguel chantoulle unha navalla no estómago, xusto na ferida, para que non puidese berrar mentres a Abel o tiraba por un acantilado abaixo. A Miguel deixouno no hospital e Abel morreu.

Agora, Reina e mais Miguel van todos os meses ao acantilado a recordalo para encher ese vacío que teñen, pois os dous o querían moito e el a eles tamén.

O personaxe que máis me gustou e chamou a miña atención foi Abel, polo seu sentido de ver a vida e pola súa maneira de comportarse coa xente. O personaxe que menos me gustou foi o Maqui, pois traizoou os seus amigos no último momento. Ademais diso, pareceume un mal xesto que empurrara así a Abel polo acantilado abaixo, sen el ter culpa ningunha. O que máis me gustou deste libro foi a forma de contar o que lle sucedía e pensaba Abel. Con esta historia aprendín varias cousas, pero entre elas, que non hai que confiar en todas as persoas, pois algunhas pódenche traizoar.

Esta obra recoméndolla ás persoas ás que lles gusten as historias e finais máis ben tristes. Alba Tobío (2º D)

Anotación publicada no blog «Linguason» do Clube de Lingua do IES de Porto do Son.

Chuzame! A Facebook A Twitter

«E ti que farías por min?» de Fina Casalderrey hoxe no Contomar

10 Maio 2010

Animación á lectura,Clubs_de_lectura,Merlín,Noticias

Malta e Marqués, dous cans que viven na rúa e pasan moita fame, achéganse ao vertedoiro na procura de algo de comida: mentres Malta remexe no lixo buscando algo de proveito, Marqués fálalle das moitas cousas que podería facer por ela… Esta é a historia de ¿E ti que farías por min?, de Fina Casalderrey, un dos contos protagonistas da sesión deste luns 10 de maio no Contomar. Será ás 18:00h na Biblioteca Municipal de Gondomar, organizado por Espazo Lectura.

Chuzame! A Facebook A Twitter

Unha fermosa guía de lectura de «Contos para levar no peto»

29 Abril 2010

Animación á lectura,Clubs_de_lectura,Merlín,Xerais nos blogs

Moitas grazas ao CEIP Alexandre Bóveda por este magnífico traballo arredor de Contos para levar no peto.

Chuzame! A Facebook A Twitter

Jacobo Fernández Serrano presenta «Mil cousas poden pasar» en Espazo Lectura

24 Abril 2010

Autores,Clubs_de_lectura,Merlín,Noticias,Premios_Xerais,Presentacións,Xerais nos blogs

Hoxe, sábado, 24 de abril, ás 12:00 horas, na Biblioteca Pública de Gondomar, o escritor e ilustrador Jacobo Fernández Serrano participa no club de lectura Lendo Contigo de Espazo Lectura.  Nesta ocasión, ademais de contar coa presenza do autor, o club prepara outras moitas sorpresas: música de tuba, concursos fantásticos e presentacións inesperadas. Unha cita imprescindible arredor da lectura para toda a familia. A actividade, enmarcada dentro da Semana do Libro e a Lectura que a asociación Espazo Lectura organiza en Gondomar, vai dirixida a nenos e nenas de 7 a 11 anos.

O libro proposto para celebrar esta semana lectora será Mil cousas poden pasar, publicado pola editorial Xerais e gañador do Premio Merlín de Literatura Infantil 2009. Mil cousas poden pasar conta o encontro absolutamente disparatado dunha serie de personaxes insólitos nun lugar onde a imaxinación fai posible que o raro sexa normal, o absurdo sexa lóxico e o excepcional sexa cotián. Unha historia surrealista, divertida e desbordante de creatividade.

Chuzame! A Facebook A Twitter

Concerto de «Peaxes» en Vigo, sábado 17 de abril en «La Pecera»

15 Abril 2010

Clubs_de_lectura,Concertos,Música,Narrativa,Noticias,Opinións_lectores/as,Xerais nos blogs

O sábado 17 de abril ás 22.30 h. no pub «La Pecera» de Vigo, os grupos RemolcaMadriña e Doctor Harapos realizarán un concerto no que tocarán algunhas das cancións que aparecen en Peaxes, a novela de Santiago Lopo. A entrada é libre. Ao final do concerto, o autor asinará libros. Tamén se poderán adquirir exemplares in situ grazas á colaboración da libraría Versus.

Arredor de Peaxes estanse desenvolvendo interesantes iniciativas. Velaí unha proposta de book-crossing, promovida polo Club de Lectura Balbordo. Recomendamos, ademais, a lectura dos numerosísimos comentarios sobre a novela publicados polo alumnado do IES Sánchez Cantón de Pontevedra (a partir do cuarto comentario).

Chuzame! A Facebook A Twitter

Dous contos na Casa da Lectura

9 Marzo 2010

Animación á lectura,Clubs_de_lectura,Infantil,Sopa de Libros

Esta semana, na actividade de dinamización lectora da Casa da Lectura de Espazo Lectura contaranse dous contos editados por Xerais: A aventura sorprendente dun homiño moi valente, o fascinante e disparatado libro escrito e ilustrado por Hans Traxler, e Dez abellas na laranxeira, de Marilar Aleixandre. A partir destes contos, os dous rimados, os participantes xogarán co ritmo, porán a proba a súa memoria visual e, finalmente, converteranse en poetas, xa quereconstruirán poemas imcompletos. A actividade será o mércores 10 na Casa da Lecura a partir das 18.00 horas.

Chuzame! A Facebook A Twitter

«Linda á espreita», hoxe no Contomar de Espazo Lectura

1 Marzo 2010

Álbums,Animación á lectura,Clubs_de_lectura,Infantil,Xerais nos blogs

Linda á espreita, de Alexander Steffensmeier, será un dos contos protagonistas da sesión do Contomar que organiza Espazo Lectura este luns, ás 18:00h na Biblioteca Municipal de Gondomar. Coa historia de Linda, a vaca que se agochaba cada mañá para meterlle un susto ao carteiro, os membros do Contomar celebrarán o cumprecontos de Ruoqi. Ademais, recibirán a visita de Manuel, un profesor do CEP Neira Vilas, de Peitieiros, que nos traerá o conto De quen foi a culpa?

Chuzame! A Facebook A Twitter

«Dime algo sucio» no Club de lectura Sete Vidas de Espazo Lectura

2 Febreiro 2010

Clubs_de_lectura,Narrativa,Noticias

Hoxe, martes, 2 de febreiro, na Biblioteca Municipal de Gondomar, Espazo Lectura organiza a sesión mensual do seu Club de lectura Sete Vidas centrado na narrativa. Nesta ocasión, o libro escollido é a última novela do escritor Diego Ameixeiras titulada Dime algo sucio.

Chuzame! A Facebook A Twitter

Encontro virtual con Agustín Fernández Paz

30 Xaneiro 2010

Autores,Clubs_de_lectura,Infantil,Merlín,Noticias,Presentacións

Nas sesións do club de lectura compartida Lendo Contigo de Espazo Lectura un dos elementos máis motivadores e atractivos para os nenos e nenas que participan é poderen establecer un diálogo cos autores e autoras dos libros que len.  Nesta ocasión, o atractivo do encontro con Agustín Fernández Paz, o autor de Valados, tamén estará na fórmula utilizada. Convertirase a biblioteca nun espazo virtual para que, por primeira vez, os asistentes á actividade teñan a oportunidade de conversar co autor a través de videoconferencia, nunha experiencia novidosa que une a lectura coas novas tecnoloxías.

Ao comezo da sesión, e axudados pola guía de lectura que Espazo Lectura lles proporcionou ás familias, falaremos sobre Valados, o libro proposto. A continuación, os participantes manterán un encontro virtual con Agustín Fernández Paz durante o cal os nenos e nenas poderán facerlle todas aquelas preguntas que lles xurdisen tras a lectura do libro. O acto, enmarcado na celebración do Día escolar da non violencia e pola paz, pecharase coa proxección dun audiovisual sobre os muros existentes no mundo con guión literario do propio Fernández Paz.

A actividade celebrarase hoxe o sábado 30 de xaneiro, a partir das 12.00h, na Biblioteca Municipal de Gondomar.

Chuzame! A Facebook A Twitter

Encontro con Fina Casalderrey no Club de Lectura «Tendendo redes»

19 Xaneiro 2010

Clubs_de_lectura,Fóra de Xogo,Noticias,Presentacións,Xuvenil

O vindeiro mércores, 20 de xaneiro, entre as 17:00 e as 19.00 horas, terá lugar nas instalacións do Consello da Cultura Galega un encontro-coloquio coa escritora Fina Casalderrey con motivo da súa novela A pomba e o degolado. O acto, conducido por Miguel Vázquez Freire, está organizado polo Club de lectura «Tendendo redes» de Gálix.

Chuzame! A Facebook A Twitter

Rosa Aneiros presenta «Sol de Inverno» en Gondomar

1 Decembro 2009

Clubs_de_lectura,Narrativa,Noticias,Premios_Xerais,Presentacións

Hoxe celébrase na Biblioteca Municipal de Gondomar a sesión de decembro do Club de Lectura Sete Vidas da asociación Espazo Lectura arredor de Sol de Inverno, a obra da escritora Rosa Aneiros gañadora da última edición do Premio Xerais de Novela. Pódese completar a información aquí.

Chuzame! A Facebook A Twitter

«Festina lente», presentación en Gondomar

22 Outubro 2009

Clubs_de_lectura,Narrativa,Noticias,Presentacións

A libraría Libraida, en colaboración con Edicións Xerais, organiza un encontro co escritor Marcos Calveiro, autor de Festina lente, a novela proposta no club de lectura Sete Vidas para o mes de outubro. O acto, presentado polo profesor Manuel Candelas, celebrarase este venres, 23 de outubro, ás 20.30 horas na libraría Libraida (Rosalía de Castro núm. 13, Gondomar).

Chuzame! A Facebook A Twitter

An Alfaya no Club de Lectura de Gálix

Autores,Clubs_de_lectura,Fóra de Xogo,Narrativa,Noticias

Chuzame! A Facebook A Twitter

Canteiro en Compostela con "Festina lente"

23 Xuño 2009

Clubs_de_lectura,Historia,Narrativa,Noticias

XG00139001O club de lectura Gálix Tendendo Redes remata a súa primeira andaina de actividades cun programa arredor da novela  Festina lente de Marcos Calveiro, organizado en colaboración coa asociación Amigos del Románico.

As actividades inícianse o día 2 de xullo no Consello da Cultura Galega, cunha lectura colectiva da novela a partir das 17:00 horas e  cunha conferencia, a partir das 19:00 horas, de  Carlos Sastre, experto en iconografías medievais, renacentistas, modernas e contemporáneas establecerá as claves entre arte e literatura ao longo da Historia.
O día 4 de xullo, sábado, desenvolvarase unha xornada artístico-literaria polos escenarios de Festina lente en Santiago de Compostela, así como cunha actividade de Bookcrossing, patrocinada por Edicións Xerais de Galicia, na que se deixarán en variados escenarios da zona vella de Santiago de Compostela exemplares da novela de Calveiro e doutras tanto dos autores escollidos este ano no club de lectura como doutros pertencentes á literatura xuvenil galega. Rematará a xornada cun recital poético que leva como lema “Canteiro en Compostela”, no cal moitas das nosas poetas e moitos dos nosos poetas labrarán con palabras a beleza da cidade pedra.

Para participar nas actividades do día 4 de xullo cómpre inscribirse enviando un correo  a galix@galix.org, anxelagracian@hotmail.com, tuiverde@gmail.com ou tendendorredes@gmail.com

Aconsellamos baixar o programa en pdf dende aquí.

Chuzame! A Facebook A Twitter

"A expedición do Pacífico" no Club de Lectura de Gálix

2 Xuño 2009

Clubs_de_lectura,Noticias

XG00025302Organizado polo Club de Lectura Tendendo Redes de Gálix, mañá mércores, 3 de xuño, entre as 17:00 e as 19:00 horas, nas instalacións do Consello da Cultura Galega en Santiago terá lugar a primeira sesión de traballo arredor d’ A expedición do Pacífico a novela coa que Marilar Aleixandre obtivera o Premio Merlín en 1994. O día 16 de xuño, Marilar participará nunha sesión cos membros do Club para abordar o proceso de creación da novela e outros detalles.

Chuzame! A Facebook A Twitter