Acto arredor de «En castellano no hay problema» mañá martes en Compostela

8 Novembro 2010

Lingua,Música,Noticias,Presentacións

Mañá martes terá lugar en Santiago de Compostela un acto arredor do libro En castellano no hay problema, de Carlos Callón, durante o que se celebrará un debate arredor da música en lingua galega no que participarán a cantante Uxía Senlle, o músico e sociolingüista Carlos Valcárcel (creador do grupo de pop electrónico Projecto Mourente), así como o propio Carlos Callón, presidente da Mesa pola Normalización Lingüística.

O evento terá lugar mañá, 9 de novembro, ás 20 h no local da asociación cultural O Galo (San Miguel dos Agros, 2, fronte á igrexa de San Martiño Pinario).

Homenaxe de despedida a Herminio Barreiro nun acto cívico en Sisán

Autores,Noticias

Hoxe, ás cinco da tarde, celebrarase unha homenaxe civil en Sisán, Ribadumia, ao profesor e pedagogo Herminio Barreiro, falecido o pasado sábado en Compostela. No acto participará o escritor e presidente da Real Academia Galega, Xosé Luís Méndez Ferrín, o investigador Luís Cochón, algúns compañeiros de xeración como Daniel Pino, Narciso de Gabriel, aí como os seus propios fillos, que lerán algún textos, e Branca Novoneyra.

No blog Fírgoa poden verse os principais enlaces sobre o seu pasamento.

Herminio Barreiro foi membro do grupo Brais Pinto, así como profesor da Facultade de Ciencias da Educación na Universidade de Santiago. Recentemente publicou en Xerais as súas memorias Recordar doe, a fermosa crónica sentimental dunha experiencia escolar e universitaria que arrinca da inmediata posguerra.

A dirección e o cadro de persoal de Xerais expresa o seu pesar polo seu falecemento.

«Todo é silencio», de Manuel Rivas, en Trafegando Ronseis

Blogs,Narrativa

O blog Trafegando Ronseis recolle a opinión dunha colaboradora sobre Todo é silencio de Manuel Rivas. Trátase da valoración dunha lectora que podemos ler aquí. O texto remata deste xeito: «porque temos boca e falamos, temos ollos e vemos, temos oído e oímos, recomendámosvos a lectura desta novela».